कैलालीको लम्कीचुहा नगरपालिका–९ स्थित सरस्वती माध्यमिक विद्यालय प्रतापुरको क्वारेन्टाइनमा राखिएका २१ वर्षीय कोरोना भाइरस संक्रमित युवक भारतको मुम्बईबाट गौरीफन्टा नाका हुँदै कैलाली फर्किएका खुलेको छ ।

नगरपालिकाको स्वास्थ्य संयोजक जयन्ती बिसीका अनुसार उनलाई चैत १२ गते विद्यालयको क्वारेन्टाइनमा पुर्‍याइएको थियो ।

उनीसहित त्यो स्कूलको क्वारेन्टाइनस्थित एकैकोठामा ४ जनालाई राखिएको थियो भने विद्यालयमा ४४ जनालाई विभिन्न कोठामा राखिएको स्वास्थ्य संयोजक बिसीले जानकारी दिइन् ।

‘क्वारेन्टाइनमा ४४ जनाले विद्यालयका साझा शौचालय प्रयोग गर्ने गरेका थिए । सबैलाई छुट्टाछुट्टै शौचालयको कुनै व्यवस्था थिएन । महिला र पुरुषका लागि छुट्टाछुट्टै शौचालय मात्रै थिए,’ उनले भनिन्, ‘खाना भने पकाएर दिने गरिएको थियो । क्वारेन्टाइनमा सामाजिक दूरी कायम थियो ।’

यति मात्रै नभई ती युवकसहित गौरीफन्टा नाकामा १ हजार जना २४ घण्टासम्म नेपाल प्रवेश नपाउँदा सँगै बसेका थिए । पछि उनीहरूलाई चैत ११ गते राति एउटा बस बूक गरेर लम्कीको क्वारेन्टाइनमा पुर्‍याइएको थियो ।

जिल्लास्थित स्थानीय तहमा बनाइएको क्वारेन्टाइनमा संक्रमित भेटिएपछि सो क्षेत्रमा त्रास सिर्जना भएको छ । स्वास्थ्यकर्मी समेत त्रसित भएको स्वास्थ्य संयोजक बिसीले बताइन् । संक्रमित ती युवाको रिपोर्ट ‘पोजिटिभ’ देखिएपछि उनलाई शनिवार बिहान सेती प्रादेशिक अस्पतालमा ल्याइएको छ तर त्यसबारे आफूहरूलाई कुनै जानकारी नदिइएको संयोजक बिसी बताउँछिन् ।

उनले भनिन्, ‘एम्बुलेन्समा उहाँलाई बिहान धनगढी लगे । उहाँको रिपोर्टबारे हामीलाई पनि थाहा दिइएको थिएन । दिउँसो मात्रै थाहा पायौं ।’ उनको रिपोर्ट ‘पोजिटिभ’ देखिएपनि उनको स्वास्थ्य अवस्था भने सामान्य रहेको बताइएको छ ।

उनीसँगै एउटै कोठामा बसेका अन्य ३ जनालाई पनि सेती अस्पताल ल्याइने बताइएको छ । जिल्ला स्वास्थ्य कार्यालय कैलालीका फोकल पर्सन जयसिंह भण्डारीले एउटै कोठामा बसेका युवकमा संक्रमण देखिएपछि सँगै रहेकालाई पनि धनगढी ल्याउने उनको भनाइ छ ।

उनीसँगै कैलालीमा मात्रै कोरोना संक्रमितको संख्या ३ जना पुगेको छ । यसअघि विदेशबाट आएका धनगढीकै १ युवामा संक्रमण देखिएको थियो । विदेशबाट फर्केका ती युवककी भाउजुमा समेत संक्रमण भएको पुष्टि भएको छ । स्वास्थ्य तथा जनसंख्या मन्त्रालयले रिपोर्ट सार्वजनिक गर्दै उनकी भाउजुमा पनि संक्रमण देखिएको जनाएको छ ।

भारतको उत्तराखण्डबाट केही समयअघि फर्केका कञ्चनपुरको बेदकोटका ४१ वर्षीय पुरुषमा पनि कोरोनाको संक्रमण रहेको पाइएको छ । उनी पनि क्वारेन्टाइनमा रहेका थिए । योसँगै सुदूरपश्चिममा मात्रै संक्रमित संख्या ४ पुगेको हो । चारै जनालाई सेती प्रादेशिक अस्पतालमा उपचारको लागि ल्याइएको छ ।