बेलायतको क्याम्ब्रिजमा सेवानिवृत्त एक पेन्टरले कोरोनाभाइरस लकडाउन सहन नसकी आफ्नी पत्नीलाई चक्कु हानेर मारेको अनि आत्महत्या गरेको खबर छ । 

एलन स्मिथ नामक ७१ वर्षीय ती व्यक्ति र उनकी पत्नी एल्सीको शव उनीहरूकै घरमा बुधवार भेटिएको थियो । 

एल्सीको घाँटी र टाउकोमा चक्कु प्रहार गरिएको थियो भने एलन आफ्नो ओछ्यानमा मृत भेटिएका थिए । 

एलन कसरी मरे भन्ने खुलेको छैन । 

यस जोडीका छिमेकीहरूले आफूहरूलाई एलनले लकडाउनमा बस्दा डर लागेको अनि पसल जान नपाएकोमा पीर गरेको बताए । खाना पनि सकिँदै गएको उनले छिमेकीलाई बताएका थिए । 

उनलाई आफ्नो नियमित औषधि नपाइने पीर पनि थियो । 

लकडाउन लगाइएयता बेलायतमा हत्या र आत्महत्याका अन्य घटना पनि भएका छन् । 

सरकारका एक मन्त्रीले कोरोनाभाइरसभन्दा लकडाउनले बढी हानि गर्ने किनकि यसले गर्दा घरेलु हिंसा, बेरोजगारी र मानसिक रोगमा वृद्धि हुने चेतावनी दिएलगत्तै यो वीभत्स घटना सार्वजनिक भएको हो ।