काठमाडौं उपत्यकामा सबैभन्दा बढी व्यस्त रहने प्रहरीमध्ये एक हो, महानगरीय ट्राफिक प्रहरी ।

उपत्यकाको अस्तव्यस्त सवारी साधनले गर्दा सामान्य समयमा ट्राफिक प्रहरीको व्यस्तता यति हुन्छ कि पानी पिउने र पिसाब गर्नेसम्म पनि फुर्सद हुँदैन ।

उपत्यकामा हुने ट्राफिक अस्तव्यस्तताले गर्दा बेलुका घर जाँदा धुलाम्मे हुने ट्राफिक प्रहरीलाई कोरोनाभाइरस (कोभिड– १९) को जोखिमका कारण घोषित लकडाउनले केही फुर्सद मिलेको छ ।

उपत्यकाका विभिन्न चोकमा ट्राफिकहरू त छन् तर सवारीको चाप नभएका कारण खासै व्यस्तता छैन । दिन कटाउन भने केही गाह्रो भइरहेको ट्राफिक प्रहरीहरू बताउँछन् ।

‘अन्य समयमा सवारी साधन व्यवस्थापन गर्दा र गाडीको चर्को ध्वनी सुन्दा दिन बित्ने गर्दथ्यो, अहिले विनाअनुमतिका सवारी साधन अनाधिकृतरूपमा चलेका छन् कि भनेर हेर्नुपरिरहेको  छ, खासै व्यस्तता छैन,’ सामाखुशी चोकमा ड्युटीमा खटिएका ट्राफिक प्रहरी जवान यमबहादुर थापाले भने ।

कोटेश्वर चोकमा खटिएका एक ट्राफिक प्रहरी हवल्दार पनि दिन कटाउन निकै गाह्रो भएको र सडक जताततै सुनसान हुँदा मोबाइल हेर्दैमा वाक्क भएको बताउँछन् ।

उनले लोकान्तरसँग भने, ‘अहिले त सडक खाली छ । सवारी साधनहरू पनि चल्दैनन् । मोबाइलमा सामाचार हेर्दाहेर्दा वाक्क लाग्न थाल्यो ।’

‘सवारीसँगै व्यस्त रहने बानी परेकाले सवारी साधन नचल्दा दिन कटाउन मोबाइलको सहारा लिनुपर्ने अवस्था आएको छ, त्यो पनि झ्याउ लाग्न थालेको छ,’ ठट्यौली पारामा उनले थपे ।

यता महानगरीय ट्राफिक प्रहरी कार्यालयका प्रमुख वरिष्ठ प्रहरी उपरीक्षक (एसएसपी) भीम ढकाल भने लकडाउनको समयमा ट्राफिक प्रहरीको भूमिका अझ धेरै भएको बताउँछन् ।

‘लकडाउनको समयमा ट्राफिक प्रहरीको भूमिका अझ धेरै हुन्छ,’ एसएसपी ढकालले लोकान्तरसँग भने ।

सरकारले अनुमति दिएका अत्यावश्यक सवारीहरू खाद्यन्न, खानेपानी, औषधि र सरसफाइसँग जोडिएका गाडीहरूलाई व्यवस्थापन गर्नका लागि ट्राफिक प्रहरी खटिराखेको एसएसपी ढकालले जानकारी दिए ।

उनले भने– ‘अत्यावश्यक सवारी साधनको व्यवस्थापनमा अहिले ट्राफिक प्रहरी खटिराखेको अवस्था छ, उनीहरूको पास छ कि छैन भनेर जाँच्ने काम पनि ट्राफिक प्रहरीकै हो ।’

ट्राफिक प्रहरीलाई नदेखेको खण्डमा गाडीहरू सडकमा जथाभावी गुड्ने गरेको ढकालको अनुभव छ ।

उपत्यकामा १ सय ४८ स्थानमा ट्राफिक प्रहरीको ड्युटी

महानगरीय ट्राफिक प्रहरी कार्यलय मातहत काठमाडौं उपत्यकामा रहेका सबै ट्राफिक प्रहरी १ सय ४८ ठाउँमा ड्युटीमा खटिरहेको एसएसपी ढकालले बताए ।

‘अहिले पनि ट्राफिक प्रहरी उपत्यकामा १ सय ४८ ठाउँमा ड्यूटीमा खटिरहनुभएको छ । अरू समयमा पनि खटिने यसैगरी हो,’ ट्राफिक प्रहरी प्रमुख ढकालले लोकान्तरसँग भने ।

रातिको समयमा उपत्यकाका नाकाहरू नागढुंगा, कलंकी, कोटेश्वर, सातदोबाटो, शहरका मुख्य चोकहरू बानेश्वर, कालीमाटी, सिंहदरबार, नारायणगोपाल चोक, दरबारमार्ग, माइतीघर, सामाखुशी, नयाँबसपार्क लगायतका ४५ ठाउँमा ट्राफिक प्रहरी र ३९ ठाउँमा सादा पोशाकमा ट्राफिक प्रहरी ड्यूटीमा खटिएको महाशाखाले जनाएको छ ।

अत्यावश्यक जस्तै अस्पताल जानुपर्ने, मलामी जानुपर्ने, कोहीलाई केही समस्या परेको खण्डमा सहयोग गर्नुपर्ने अवस्था रहेको एसएसपी ढकालले बताए ।

१२ दिनमा ४१ सय गाडी होल्ड

चैत ११ देखि चैत २२ गतेसम्मका १२ दिनमा महानगरीय ट्राफिक प्रहरी कार्यलयले ४ हजार १ सय गाडी होल्ड गरेर छाडेको छ । विनाअनुमति चल्ने सवारी साधनलाई होल्ड गरेर छाड्ने गरिएको छ ।

दैनिक सरदर ४ सय ७ सवारी साधनलाई नियन्त्रणमा लिई होल्ड गरेर छाड्ने गरेको एसएसपी ढकालले लोकान्तरलाई बताए । 

ट्राफिक प्रहरीले अनावश्यक रूपमा बाहिर निस्कने सवारी साधनलाई होल्ड गर्दै आएको छ भने लकडाउनका समयमा बाहिर निस्कने मानिसहरूलाई पनि व्यवस्थापन पनि गरिरहेको छ ।