कोरोनाभाइरसले गला र फोक्सो मात्र नभई दिमागलाई पनि असर पार्ने गरेको देखिएको छ । संसारभरिका न्युरोलोजिस्टले यसलाई पुष्टि गरिरहेका छन् । 

उनीहरूका अनुसार, कुनै कुनै रोगीहरूलाई मस्तिष्कसम्बन्धी रोग लागेको छ । त्यस्ता रोगीको दिमाग सुन्निने, दिमागमा रगत जम्ने र बोल्ने क्षमता गुम्ने लक्षण देखिएका छन् । 

त्यसो त कोरोनाको मुख्य लक्षण ज्वरो, खोकी र सास फेर्न समस्या आउनु हो । तर केही रोगीमा चाहिँ ब्रेन डिस्फंक्सनको समस्या देखिएको छ । त्यसले गर्दा रोगीहरू सुँघ्न र स्वाद चिन्न पनि सकिरहेका छैनन् । अनि मुटुरोग पनि यसले बल्झाइरहेको छ । 

मार्च महिनाको शुरूतिर ७४ वर्षीय एक रोगीलाई खोकी र ज्वरो आएपछि आकस्मिक कक्ष लगियो । उनको एक्सरे गर्दा निमोनिया भएको कुरा आयो र उपचारपछि घर पठाइयो । 

घर आएको भोलिपल्ट रोगीलाई फेरि चर्को ज्वरो आयो । अनि उसका परिवारका सदस्यले फेरि अस्पताल लगे । अचानक रोगीलाई सास फेर्नै समस्या भयो । स्वास्थ्य बिग्रिएर रोगीले डाक्टरलाई आफ्नो नाम समेत बताउन सकेनन् । उनले बोल्ने क्षमता गुमाए ।

ती रोगीलाई फोक्सोको समस्या थियो र पार्किन्सन्सको पनि । पछि उनले हातगोडा चलाउन पनि सकेनन् र मिर्गी लागेको देखियो । उनको स्वास्थ्य परीक्षण गर्दा कोरोना पाइयो ।

इटली तथा अन्य देशका चिकित्सकले कोरोना संक्रमितलाई मस्तिष्क रोग पनि लागेको पाए । इटलीमा त्यस्ता रोगीका लागि फरक न्युरो कोभिड इकाइ शुरू गरिएको छ । 

पिट्सबर्ग विश्वविद्यालयका न्युरोलोजिस्ट डा शेरी चोउका अनुसार, मस्तिष्क रोगका लक्षणको जानकारी लिने प्रयास बढाइएको छ । फोक्सोमा समस्या हुँदा भेन्टिलेटरमा राखिने भए पनि दिमागमा समस्या हुँदा राख्ने भेन्टिलेटर नभएको उनले बताए । 

उता चिनियाँ शोधकर्ताहरूले हालै प्रकाशित गरेको एक अध्ययन निष्कर्षमा कोरोनाभाइरस श्वासनलीमा मात्र सीमित नरही स्नायु प्रणालीसम्म पनि पुगिसकेको उल्लेख छ । फेब्रुअरी महिनामा चीनमा कोरोना संक्रमितमा मानसिक रोगको लक्षण पनि भेटिएको अध्ययनमा लेखिएको छ ।