शाइन रेसुंगा डेभलपमेन्ट बैंक लिमिटेडले प्रदेश ५ सरकारले स्थापना गरेको कोरोना नियन्त्रण तथा उपचार कोषमा २५ लाख ५० हजार रुपैयाँ प्रदान गरेको छ ।

सोमवार  मुख्यमन्त्री कार्यालयमा बैंकका प्रमुख कार्यकारी अधिकृत प्रकाश पौडेल, बैंकका पूर्व अध्यक्ष थानेश्वर पौडेल, सञ्चालक डा. ताराप्रसाद उपाध्याय र मोहन चापागाईले मुख्यमन्त्री शंकर पोखरेललाई सहयोग रकम बराबरको चेक प्रदान गरेका हुन् ।

प्रदेश सरकारले १० करोड रुपैयाँ जम्मा गरेको स्थापना गरेको कोषमा निजी क्षेत्रबाट हालसम्म सबैभन्दा धेरै रकम दिने संस्थामा शाइन रेसुंगा बैंक रहेको प्रदेश कोष तथा लेखा नियन्त्रक कार्यालयका प्रमुख दीपक ज्ञवालीले बताए । 
कोषमा बैंक, सहकारी र निजी क्षेत्रका संघसंस्थाले हालसम्म ९१ लाख रुपैयां जम्मा गरेका उनले बताए । 

चेक हस्तान्तरणका अवसरमा बोल्दै मुख्यमन्त्री पोखरेलले विश्वव्यापी महामारीका रुपमा फैलिएको कोरोना भाइरस नियन्त्रण र संक्रमतिको उपचार सरकार एक्लैले गर्न नसक्ने हुंदा निजी क्षेत्रको साथ र सहयोगको खाँचो रहेको बताए ।

उनले प्रदेश ५ मा डाक्टर र अन्य स्वास्थ्यकर्मीका लागि पीपीई लगायत सुरक्षा सामग्री अझै पर्याप्त नभएकाले त्यस्ता सामग्री सरकारलाई उपलब्ध गराउन निजी क्षेत्रसँग आग्रह गरे ।

बैंकका प्रमुख प्रशासकीय अधिकृत पौडेलले अस्पताललाई स्वास्थ्य सुरक्षा सामग्री पनि बैंकले उपलब्ध गराउने प्रतिबद्धता जनाएका छन् ।