कांग्रेसले बनायो कोरोना जाँच्ने ‘स्व–परीक्षण एप’

प्रतिकात्मक तस्वीर

प्रमुख प्रतिपक्षी दल नेपाली कांग्रेसले विशेषज्ञ चिकित्सकको परामर्शमा सोमवार एक वेब एप जारी गरेको छ ।

कांग्रेसको केन्द्रीय सूचना, सञ्चार तथा प्रचार विभागले पार्टीको वेबसाइट www.nepalicongress.org/covid19/ मार्फत  एप सोमवार जारी गरेको पार्टी प्रवक्ता एवं विभाग प्रमुख विश्वप्रकाश शर्माले जानकारी दिए ।


Advertisement

वेब एपमा घरमै बसेर पनि कोरोना भाइरस संक्रमणको लक्षण आफूमा रहे/नरहेको परीक्षण जो कसैले गर्न सक्ने उनले बताए ।

कसैमा कोरोना संकेत देखिए भौतिक परीक्षण र उपचारका लागि प्रेरित गर्ने तथा नदेखिए मानसिक तनावबाट मुक्तिलाई सघाउने वेब एपको विशेषता रहेको छ ।


Advertisement

नागरिकमा कोरोना जोखिमबारे सचेतना थप अभिवृद्धि गराउने, भौतिकरुपले परीक्षणको दायरा व्यापक हुन नसकेको अहिलेको परिस्थितिमा मनोवैज्ञानिक रुपले ठूलो जनसंख्यालाई स्व–परीक्षणमा सघाउने र सतर्कताका लागि जागरुक गराउने तथा सङ्क्रमणको लक्षण देखिएका नागरिकको पहिचान गर्न बल पुर्‍याउँदै व्यक्ति, समुदाय र सरकारलाई सघाउने एपको उद्देश्य रहेको प्रवक्ता शर्माले बताए ।

एपको चिकित्सकीय परामर्शका लागि नेपाल मेडिकल एसोसिएशन पूर्व अध्यक्ष, डा अञ्जनी झा, सरुवा रोग विशेषज्ञ डा. वासुदेव पाण्डे, नेपाल मेडिकल एसोसिएशनका उपाध्यक्ष डा. अनिलविक्रम कार्की र फोक्सो रोग विशेषज्ञ डा. अशेष ढुंगानालाई तोकिएको छ ।

एपको निर्माण सेन्टर फर डेमोक्रेटिक इन्जिनियर्स नेपाल (सिडेन) का पूर्व केन्द्रीय सदस्य ई शशांकश्री न्यौपाने र सिडेनका पूर्व महासचिव ई दीपेश विष्टको समूहले गरेको पार्टी कार्यालयले जनाएको छ । थप सुझाव ग्रहण गर्दै वेब एपको भर्सन परिमार्जित गरिँदै जाने प्रवक्ता शर्माले जानकारी दिए ।

कमेन्ट गर्नुहोस्