कोरोना भाइरसको संक्रमण रोकथाम र नियन्त्रणका लागि काठमाडौँ महानगरपालिकाले विदेश भ्रमण गरी फर्केकाको विवरण संकलनलाई तीव्रता दिएको छ ।  

महानगरले  फागुन १८ पछि फर्केका १ सय १७ जनाकाे विवरण  संकलन गरेकाे हाे। विदेशबाट फर्कनेहरू, अझ भारतबाट आएका नेपाली नागरिकहरू १४ दिनसम्म अनिवार्य रूपमा क्वारेन्टाइनमा बस्नै पर्ने नियमलाई पालना गर्नका लागि महानगरपालिकाले यस्तो विवरण संकलनको कामलाई तिव्र रुपमा अघि बढाएको जानकारी दिएको छ।

‘हामीले पहिलो चरणमा ३२ वटै वडासम्म पुगेर पछिल्लो एक महिनामा विदेश भ्रमण गरी महानगरमा बसोवास गर्दै आएका नागरिकको विवरण संकलन गर्ने, उनीहरुको अवस्था बुझ्ने र आवश्यकता अनुसार नमुना परीक्षणका लागि स्वाब संकलन समेत गर्ने तयारी गरेको छौँ,’ मेयर विद्यासुन्दर शाक्यले भने, ‘उपत्यका नगरपालिका फोरमको आजको बैठकले पनि यसरी विदेश भ्रमण गरी उपत्यका भित्रै वसोवास गर्नेहरुको विवरण संकलन गरी नमुना परीक्षणका लागि स्वाब संकलन गर्ने कामलाई तिव्र रुपमा अघि बढाउने निर्णय गरेको छ । विभिन्न सरोकारवाला निकायहरुसँगको सहकार्यमा त्यसो गरियो भने उहाँहरुलाई पनि ढुक्क हुन्छ, परिवार, छरछिमेक र समाजलाई पनि ढुक्क हुन्छ । त्यसैले हामीले विदेश भ्रमण गरी आएकाहरुको विवरण संकलन सुरु गरेका हौँ ।’   

यसरी आइतबारसम्म विवरण संकलन गरेका १ सय १७ मध्ये सबै भन्दा बढी दुबईबाट फर्किएका छन् । त्यसैगरी कतार,फान्स, अष्टे«लिया, बेल्जिम, अमेरिका, कुवेत, जोर्डन, मलेसिया, थाइल्याण्ड, जापान, जर्मन, भारतलगायतका देशको भ्रमण गरी आएकाहरुको पनि विवरणमा संकलन गरिएको छ ।  

काठमाडौँ महानगरपालिकाका प्रशासन विभाग प्रमुख नमराज ढकालले ती मध्ये ५३ जनाको पूर्ण विवरण नै केन्द्रलाई प्राप्त भएको बताए। उनका अनुसार अहिलेसम्म वडा नम्बर–१ बाट ३, वडा २ बाट ३, त्यसैगरी वडा–६ बाट ११, वडा–७ बाट ४ जनाको विवरण केन्द्रलाई प्राप्त भएको छ । त्यसैगरी वडा–९ बाट तीन, वडा–१४ बाट ५ र वडा–१८ बाट २ जनाको विवरण संकलन भएको छ । वडा–१९ बाट ४, वडा–२१ बाट ६ र वडा–२२ बाट एक जनाको विवरण संकलन भएको पनि ढकालले जानकारी दिए। वडा–३१ मा ११ जनाको विवरण संकलन भएको छ । यसरी विवरण संकलन गरेका मध्य कतिपय सेल्फ क्वारेन्टाइनमा बसेका छन् भने कतिको अवस्था सामान्य रहेको छ ।