काठमाडौं र भक्तपुर जिल्लासँग जोडिएको कागेश्वरी मनोहरा नगरपालिकाले नगर भित्रका चार हजार ९ सय परिवारलाई राहत वितरण गरेको छ । 

विश्वव्यापी रुपमा फैलिएको कोरोना भाइरसका कारण सरकारले लकडाउन घोषणा गरेसंगै छाक टार्न समस्या भएका अतिविपन्न, असाहय र मजदुरवर्गका उपभोक्तालाई नगरपालिकाले राहत वितरण गरेको हो।

 नगरपालिकाले आइताबार साँझसम्मको तथ्यांक अनुसार  नौवटै वडाका चार हजार ९ सय परिवारलाई राहत बाँडेको जानकारी दिएको छ ।

विपद् तथा प्रकोप व्यवस्थापन कोषबाट गरिएको राहत वितरणबाट नगरभित्रका छाक टार्न मुस्किल पर्ने विपन्न परिवार लाभान्वित भएको नगरपालिकाका प्रमुख कृष्णहरि थापाले बताए।

दैनिक ज्यालादारी गरेर छाक टार्ने र विपन्न परिवारलाई चामल, दाल, खाने तेल र साबुन खरिदको लागि विपन्न परिवार छनौट गरी प्रतिपरिवार एक हजारको दरले नजिकैको खाद्यान्न पसलबाट आवश्यक सामान खरिद गर्ने गरी कुपन बाँडिएको थापाले बताए।
 
नगरपलिकाको विपद् कोषमा नगरपालिकाको ५० लाख र अन्य अनुदान तथा सहयोग संकलन स्वरुप ४० लाख गरी जम्मा ९० लाख रुपैँया संकलन भैसकेको छ । अवस्था हेरेर राहत वितरण गर्दै जादाँ नपुगेको खण्डमा नगरपालिकाले थप ५० लाख कोषमा जम्मा गर्ने पनि प्रमुख थापाले जानकारी दिए।

नगरपालिकाको वडा ६ स्थित अर्याल गाँउ नमूना टोल सुधार समितिका टोलबासी र सिन्धुपाल्चोक जिल्ला पत्रकार महासंघका अध्यक्ष महेश श्रेष्ठको सक्रियताबाट संकलन भएको २१ हजार २१५ रुपैयाँ वडा नं ६ का वडा अध्यक्ष प्रकाश फुयाँललाई हस्तान्तरण गरेका छन् । a

कोरोना रोकथाम तथा विपन्न परिवारलाई राहत प्याकेज वितरणमा सहयोग पुगोस् भन्ने हेतुले आर्थिक संकलन गरी हस्तान्तरण गरिएको स्थानीय राजेन्द्र दुलालले बताए।

वडा नं. ६ का वडा अध्यक्ष प्रकाश फुयाँलले उक्त सहयोगले ठूलो राहत मिलेको बताए। विपद् कोषमा जम्मा भएको बजेट कम भएका कारण सबै विपन्न परिवालरलाई समेट्न नसकेको खण्डमा टोलबासीले गरेको आर्थिक सहयोगबाट थप विपन्न परिवारलाई राहत बाँड्न सहयोग पुगेको बताए।
 
हालसम्म नगरपालिकाले कोरोनाको रोकथाम तथा उपचारको लागि गागलफेदी तथा विभिन्न स्वास्थ्य चौकीमा गरी ६० वटा क्वारेन्टाइन तथा ५ वटा आइसोलेसन कक्ष  तयार गरेको छ। साथै, नगरपालिकाले उपचारको लागि आवश्यक परेको खण्डमा तत्काल उद्दार गर्न चारवटा एम्बुलेन्स तयारी अवस्थामा राखेको छ।