कोरोना भाइरस (कोभिड-१९) को र्‍यापिड टेस्ट टोली सोमबार धनगढी पुगेको छ।

संघीय सरकारको शनिवार बसेको मन्त्रिपरिषद बैठकले कोरोनाको उच्च जोखिममा रहेको सुदूरपश्चिमका २ जिल्ला कैलाली र कञ्चनपुर तथा गण्डकी प्रदेशको बाग्लुङमा र्‍यापिड परीक्षण गर्ने निर्णय गरेको थियो ।

सोही अनुसार र्‍यापिड डाइग्नोस्टिक टेस्ट (आरडीटी)को लागि एक टोली धनगढी पुगेको हो।

सुदूरपश्चिम प्रदेश स्वास्थ्य निर्देशनालयका भेक्टर कन्ट्रोल निरिक्षक हेमराज जोशीका अनुसार स्वास्थ्य तथा जनसंख्या मन्त्रालयबाट ६ र यहाँका ६ जना विज्ञ गरी १२ जनाको विज्ञ सो टोलीले मंगलबारदेखि क्वारेन्टाइनमै गएर थ्रोट स्वाब नमूना संकलन गर्ने भएको छ।

मंगलवार बिहानैदेखि नमूना संकलनको कार्य सुरु गरिने बताउँदै निर्देशनालयका भेक्टर कन्ट्रोल निरिक्षक जोशीले सुरुवात भने कैलालीको लम्कीचुहा नगरपालिकाबाट गरिने लोकान्तरलाई जानकारी दिए । 

चैत २२ गते कैलालीको लम्कीचुहा नगरपालिका–९ स्थित सरस्वती माध्यमिक विद्यालय प्रतापुरको क्वारेन्टाइनमा राखिएका २१ वर्षीय एक यूवकमा कोरोना भाइरसको संक्रमण रहेको खुलेको थियो। सो अनुसार पनि सो टोलीले लम्कीबाटै आफ्नो कार्य सुरुवात गर्ने बुझिएको छ।

नमूना सलकन तथा परिक्षणको कार्ययोजना बुधबार विहान तय हुने बताउँदै जोशीले कञ्चनपुर जिल्लामा भने बुधबारदेखि कार्य थालनी हुन सक्ने उल्लेख गरे।

विश्वव्यापी रूपमा कोभिड १९ को परीक्षण दुई प्रकारले गरिन्छ। पहिलो हो पीसीआर (पोलिमरेज चेन रियाक्सन) र दोस्रो र्‍यापिड एन्टीबडी टेस्ट।

नेपालमा र्‍यापिड डाइग्नोस्टिक टेस्ट (आरडीटी) अहिलेसम्म भएको थिएन। जानकार चिकित्सकहरूका अनुसार पीसीआर परीक्षणमा कोभिड-१९ भाइरस भए नभएको जानकारी प्राप्त हुन्छ ।

आरडीटीमा भने कोभिड १९ ले संक्रमण गरेको शरीरले उत्पादन गर्ने ‘एन्टीबडी’को मात्रा परीक्षण हुने भएकाले यो परीक्षण प्रविधि पीसीआरभन्दा अलि कम विश्वसनीय हुने बताइन्छ।