अबको २ साता थप चुनौतीपूर्ण हुनसक्छ– प्रधानमन्त्री ओली

फाइल फोटो

प्रधानमन्त्री केपी शर्मा ओलीले आउँदो २ साता नेपालीका लागि थप चुनौतीपूर्ण हुनसक्ने बताएका छन् ।

मंगलवार देशवासीका नाममा सम्बोधन गर्दै प्रधानमन्त्री ओलीले आउने केही साता साह्रो/गाह्रो सहँदा थप जीवन रक्षा गर्न सकिने बताए ।


Advertisement

'आउने २ साता हाम्रा लागि थप चुनौतीपूर्ण हुनसक्छ । यो थप संक्रमण देखिन सक्ने अवधि मात्र होइन समुदायमा संक्रमण फैलिने जोखिमको अवधि पनि हो,' प्रधानमन्त्री ओलीले भने, 'आउने केही हप्ता केही साह्रो/गाह्रो सहँदा जीवन रक्षा गर्न सकिन्छ ।'

संकटको कालो बादल अवश्य हटेर जाने विश्वास पनि प्रधानमन्त्री ओलीले व्यक्त गरे ।


Advertisement

विदेशमा रहेका नेपालीहरूतर्फ लक्षित गर्दै प्रधानमन्त्री ओलीले भने, 'जो जहाँ छौं, त्यहीँ सुरक्षित रहौं । संकटको कालो बादल अवश्य हटेर जानेछ ।'

सामाजिक सञ्जाल र मिडियामा भैरहेका सरकारको आलोचनालाई प्रधानमन्त्री ओलीले कुप्रचार भने ।

'मिडिया र सामाजिक सञ्जालमा आउने गरेको आलोचनाप्रति मेरो ध्यान गएको छ,' प्रधानमन्त्री ओलीले भने, 'भ्रष्टाचार नगर्ने र गर्न नदिने सरकारको प्रतिबद्धतालाई यस्ता कुप्रचारले प्रभावित पार्ने छैन, कतै भ्रष्टाचार र अनियमितता देखिएमा निर्ममतापूर्वक कारवाही गर्न वर्तमान सरकार किञ्चित पछि पर्ने छैन ।'

प्रधानमन्त्री ओलीले थपे, 'मेरो आग्रह छ, मानवजातिलाई नै चुनौती दिएको यस लडाईंमै ध्यान केन्द्रित गरौं, अन्य सामान्य काम स्थिति सामान्य बनेपछि गर्न सकिन्छ ।'

भाइरसलाई फैलिन नदिन लकडाउन अनिवार्य बनेको प्रधानमन्त्री ओलीले बताए ।

'भाइरसलाई फैलिन नदिन सामाजिक दुरी अत्यन्त प्रभावकारी विधि हो, सामाजिक दुरीका लागि लकडाउन अपरिहार्य छ,' प्रधानमन्त्री ओलीले भने ।

भारतीय सीमामा अड्किएका २ हजार १ सय ४७ नेपालीलाई उतै क्वारेन्टाइनमा राख्ने व्यवस्था गरिएको भन्दै प्रधानमन्त्री ओलीले क्वारेन्टाइन अवधि पार गरेपछि चेकजाँच गरेर नेपाल प्रवेश गर्न दिइने बताए ।

नेपालतर्फ पनि ७ सयजना भारतीय नागरिकलाई क्वारेन्टाइनमा राखिएको उनको भनाइ थियो ।

लोकान्तर संवाददाता
लोकान्तर संवाददाता

लेखकबाट थप...

कमेन्ट गर्नुहोस्