प्रधानमन्त्री ओली र ओमानका राजकुमारबीच फोनवार्ताः ‘नेपाली श्रमिकको सुरक्षामा कमी हुँदैन’
 

केपी ओलीले नेपाली श्रमिकको रोजगारीको गन्तव्यमध्येको एक ओमानका  हिज हाइनेस (राजकुमार) शैयद फहाद वीन महमुद अल सइदसँग बुधबार साँझ फोनवार्ता गरेका छन्। 

खाडीमा रहेको नेपालीको अवस्था बुझ्न सरकार प्रतिनिधिसँग टेलिफोन वार्ता गर्ने क्रममा प्रम ओलीले ओमानका राजकुमारसँग त्यहाँका नेपाली श्रमिकको अवस्थाबारे चासो राखेका थिए।

अहिले विश्व नै कोरोना भाइरसको चपेटामा परेका बेला सरकारले विदेशमा रहेका नेपालीको अवस्थाबारे जानकारी लिँदै आएको छ। 

प्रधानमन्त्री ओलीको आधिकारिक ट्वीटरमा उल्लेख भए अनुसार  ओमान सरकारले त्यहाँ कार्यरत नेपाली श्रमिकलाई सुरक्षा र सहयोग रहिरहने निश्चित पारेको छ।   

ओलीले लेखेका छन्, ‘ठूलो संख्यामा नेपाली कार्यरत खाडी क्षेत्रका नेताहरुसंग संवाद गर्ने क्रममा आज साँझ मेरो ओमान सरकारका हिज हाइनेस शैयद फहाद वीन महमूद अल सइदसँग कुराकानी भयो । त्यहाँ कार्यरत नेपालीहरूलाई ओमानको सुरक्षा र सहयोग रही रहनेमा उहाँले मलाई निश्चिन्त पार्नुभएको छ। ’

सुदूरपश्चिमका जनप्रतिनिधिलाई मन्त्री ढकालले भने- स्वास्थ्य सामग्रीको अभाव हुन दिइन्न 

स्वास्थ्य तथा जनसङ्ख्यामन्त्री भानुभक्त ढकालले चिकित्सक र स्वास्थ्यकर्मीका लागि आवश्यक सामाग्रीको अभाव हुन नदिइने प्रतिबद्धता दोहो¥याएका छन्।

सुदूरपश्चिमबाट प्रतिनिधिसभामा प्रतिनिधित्व गर्ने तीन सांसद्को बुधबार संयुक्त मागपत्र बुझ्दै मन्त्री ढकालले कोरोना भाइरसको रोकथाम र  उपचारका लागि चिकित्सक र स्वास्थ्यकर्मीले स्वास्थ्य सामाग्रीको अभाव झेल्नु नपर्ने बताएका हुन्।

आवश्यक स्वास्थ्य सामग्री अस्पतालमा पुगेको जनाउँदै उनले कतिपय सामग्री निरन्तर नमूना परीक्षणको काम दोब्बर बनाउन बुधबार नै हेलिकोप्टरमार्फत पिसिआर मेसिन धनगढी पठाइएको जानकारी दिए।

मागपत्र बुझाउन बझाङ्गका प्रतिनिधिसभा सदस्य भैरवबहादुर सिंह, बैतडीका प्रतिनिधिसभा सदस्य दामोदर भण्डारी र दार्चुलाका प्रतिनिधिसभा सदस्य गणेशसिंह ठगुन्ना स्वास्थ्य मन्त्रालयमा आएका थिए।

आइतबारदेखि भरी ग्यास सिलिण्डर

नेपाल आयल निगमले आइतबारदेखि भरी ग्यास सिलिण्डर बिक्री वितरण गर्ने निर्णय गरेको छ । निगम सञ्चालक समितिको आज बसेकोे बैठकले १४.२ किलो (पूरै भरी) को सिलिण्डर ग्यास बिक्रीवितरण खुला गर्ने निर्णय गरेको हो ।

निगमका प्रवक्ता विनितमणि उपाध्यायका अुनसार बिहीबारदेखि नै उद्योगीलाई ग्यास भर्न दिइने छ । पछिल्लो केही दिनयता आधा सिलिण्डर ग्यासको बिक्री कम भएको जनाउँदै उद्योगीले भरी ग्यास वितरणका लागि निगमसँग आग्रह गरेका थिए ।

उद्योगीको माग र भण्डारगृह भरिएकाले निगमले भरी सिलिण्डर बिक्रीको निर्णय गरेको उनले बताए । बजारमा ग्यासको अभाव सिर्जना भएको जनाई निगमले यही चैत १६ गते अपराह्न १ बजेदेखि आधा (७.१ किलो) को ग्यास सिलिण्डर बिक्री गर्न उद्योगलाई निर्देशन दिएको थियो ।

नेपाल एलपी ग्यास उद्योग संघका अध्यक्ष गोकुल भण्डारीले सबै कम्पनीका ग्यास भण्डारगृह भरिएर बुलेटमै ग्यास राखिँदै आएको बताए । उनका अनुसार देशभरका ५९ ग्यास उद्योगमा करीब १० हजार मेट्रिक टन क्षमता रहेकामा हाल सबैको भण्डारगृह भरिएकाले एक सय बुलेटमा ग्यास राखिएको थियो ।

'एक साताअघिसम्म ग्यासको मागअनुसार डिपोमा ग्यास पु¥याउन भ्याइनभ्याइ थियो तर तीन दिनदेखि ग्यासको खपत नहुँदा डिपोमै राख्नुपरेको छ,’ उनले भने, ‘आधा सिलिण्डर ग्यास बिक्री हुन थालेपछि उपभोक्ताहरुले ग्यास लिनै मानेका छैनन् ।‘

ग्यास बिक्रेता महासंघका कोषाध्यक्ष राजेश दाहालले काठमाडौँ उपत्यकाका ३० प्रतिशत उपभोक्ताले आधा सिलिण्डर ग्यास लिनै नमानेको जिकिर गरे ।

विदेशबाट आएकाको ‘कन्ट्याक्ट ट्रेसिङ’ गर्न सिसिएमसीले खटायो जनशक्ति

छाउनीमा रहेको क्राइसिस म्यानेजमेन्ट सेन्टर (सिसिएमसी) ले विदेशबाट आएकाहरुको ‘कन्ट्याक्ट ट्रेसिङ’ गरेर विश्लेषण गर्ने भएको छ।

सिसिएमसीले चैत १ गते यता हवाइ र स्थलगतमार्ग भएर आएकाहरूको े ‘कन्ट्याक्ट ट्रेसिङ’ गर्न थालेका हो। 

‘कन्ट्याक्ट ट्रेसिङ’ निकै कम गरेको भनेर आलोचना भइरहेका बेला सेनाको प्रभूत्व रहेको सिसिएमसीले विवरण संकलन र विश्लेषणका लागि २५ जना खटाएको छ।

पहिलो चरणमा  ‘कन्ट्याक्ट ट्रेसिङ’ गरेर स्वास्थ्य अवस्थाबारे जानकारी लिने र दोस्रो चरणमा उनीहरुको सम्पर्कमा आएकाहरुको समेत विवरण संकलन गरिने भएको छ।

चिकित्सकका अनुसार ‘कन्ट्याक्ट ट्रेसिङ’ का क्रममा सम्पर्कमा आएका व्यक्तिले दिएको विवरणका आधारमा आइसोलेसन वा क्वारेन्टाइनमा राखी संक्रमण जाँचका लागि छुट्याइन्छ । संक्रमित व्यक्तिले भेटेका र सम्पर्कमा आएका व्यक्ति खोज्न प्राविधिक टिम गठन गरे पनि कति जनालाई गरिएको तथ्यांक बाहिर आउन सकेको छैन ।