प्रमुख प्रतिपक्षी दल नेपाली कांग्रेसका भातृ संगठनका पूर्व अध्यक्षले कोरोना भाइरस अर्थात कोभिड–१९ को महामारी शुरू भएको ३ महिना बितिसक्दा समेत कोरोनाको नियन्त्रणमा सरकार संवेदनशील र गम्भीर नभएको भन्दै आपत्ति जनाएका छन् ।

कोरोना भाइरसको कहरले पूरै विश्व आक्रान्त बनेका बेला जतिसक्दो चाडो परीक्षण सामग्री र स्वास्थ्यकर्मीका लागि आवश्यक सुरक्षा उपकरणको व्यवस्था गर्नुपर्ने अवस्थामा सरकारका जिम्मेवार मन्त्री नै निहीत स्वार्थ र कमिसनको खेलमा लागेको कुरा बाहिर आएपनि त्यसलाई प्रधानमन्त्रीले आफ्नो पछिल्लो सम्बोधनमा समेत नजरअन्दाज गरेकोप्रति पूर्व अध्यक्षले संयुक्त विज्ञप्ति जारी गर्दै गम्भीर आपत्ति प्रकट गरेका हुन् । 

उनीहरूले स्वास्थ्य सामग्री खरिदमा अनियमितता गर्नेलाई कारवाहीको दायरामा ल्याउन र तत्काल गुणस्तरीय स्वास्थ्य सामग्री खरिद गरी नागरिकको जीवनरक्षाको दायित्वमा गम्भीर बन्न सरकारको ध्यानाकर्षण समेत गराएका छन् । 

विज्ञप्तिमा उल्लेख छ, ‘संकटको बेला छोपी नागरिकको स्वास्थ्यमाथि भइरहेको यो तहको खेलवाडको जति भत्र्सना गरेपनि पुग्दैन । जनताको स्वास्थ्य प्राथमिकतामा राख्नुपर्ने बेलामा स्वार्थवश ठेक्का दिएकै कारण अहिलेसम्म परीक्षणको दायरा बढ्न सकेको छैन । जसका कारण नागरिकको स्वास्थ्य थप जोखिममा परेको छ । फेरि पनि विभिन्न बहानामा स्वार्थ समूहलाई नै पोस्ने गरी सरकारले स्वास्थ्य सामग्री खरिदमा ढिलाइ गरिरहेको छ, यो अर्को गम्भीर धोका हो । स्वास्थ्य सामग्री खरिदमा अनियमितता गर्नेलाई कारवाहीको दायरामा ल्याउन र तत्काल गुणस्तरीय स्वास्थ्य सामग्री खरिद गरी नागरिकको जीवनरक्षाको दायित्वमा गम्भीर बन्न सरकारको ध्यानाकर्षण गराउँदछौं ।’

नेपाल दरुण दल र नेविसंघका पूर्वअध्यक्ष क्रमशः विनोदप्रसाद कायस्थ, उदयशम्शेर राणा, महेन्द्र शर्मा, रन्जित कर्ण र नैनसिंह महरद्वारा हस्ताक्षरित संयुक्त विज्ञप्तिमा भनिएको छ, ‘ज्यानको बाजी लगाएर खटिएका स्वास्थ्यकर्मी, सुरक्षाकर्मी र सञ्चारकर्मीलाई विशेष धन्यवाद दिँदै उनीहरूका लागि प्रोटेक्टेड हुने पीपीई लगायतका स्वास्थ्य सामग्रीको प्रबन्ध गर्न, हाल करीब ५०० मात्र रहेको भेन्टिलेटरको संख्या बढाएर १ हजार ५ सय पुर्‍याउन, गुणस्तरीय टेस्टिङ किट र मशिनको उचित प्रबन्ध गरी प्रदेशमा भएका प्रयोगशालाको क्षमता बृद्धि गर्न तथा पर्याप्त बिशेषज्ञको व्यवस्था गर्न र जोखिम प्राथमिकताका आधारमा चेकजाँच गर्न तथा परीक्षणको दायरा बढाएर भय र त्रासको अन्त्य गर्न पनि माग गर्दछौं ।’

पूर्व अध्यक्षले देशका दक्षिण भूभागमा खुला सिमानाका कारण लुकीछिपी लकडाउन उल्लंघन गर्ने क्रम जारी रहेकाले सीमामा रहेका नेपालीको नैसर्गिक अधिकारको ख्याल गरी उनीहरूलाई सुरक्षित तवरले आफ्नो देशमा ल्याएर क्वारेन्टाइनको उचित प्रबन्ध गर्न पनि सरकारको ध्यानाकृष्ट गराएका छन् । महामारीबाट आउन सक्ने सम्भावित संकटलाई आत्मसाथ गरी चेकजाँचको बिशेष व्यवस्था मिलाउन, न्यून आएका भएका मजदुर किसानका लागि विशेष राहत, उद्योगी व्यावसायीका अवस्था हेरेर राहत तथा विदेशमा रहेका विद्यार्थी कामदारको स्थिति पत्ता लगाएर कूटनीतिक नियोगमार्फत उचित कदम चाल्न पनि पूर्वअध्यक्षले सरकारसँग जोडदार माग गरेका छन् ।