गत वर्ष ढलालकै क्रममा भत्किएको गुल्मी जिल्लास्थित झेदी पुल यसपालि बाढीले फेरि बगाएको छ ।

बुधवार बडिगाड खोलामा आएको बाढीले पुल बगाएको हो ।

मुसिकोट नगरपालिका–३ वडागाउँ र वडा नम्बर ७ वामी जोड्ने पुल २०७६ वैशाख १ गते भत्किएको थियो । 

पुल भत्किएको ८ महिनापछि पुन निर्माण थालिएको थियो । गत चैत मसान्तमा तल्लो ढलाई गरिएको पुल बडिगाड खोलामा आएको बाढीले बगाएको मुसिकोट नगरपालिकाका मेयर सोमनाथ सापकोटाले बताए ।

पुल २०७३ सालमा जिल्ला प्राविधिक कार्यालय गुल्मीमार्फत वाइटी जय बुद्ध कन्ट्रक्सन प्रालिले पुल निर्माणको जिम्मा पाएको थियो ।

हाल पुल निर्माणको सम्पूर्ण जिम्मा पुर्वाधार विकास कार्यालयको रहेको छ । सम्झौता अनुसार २०७५ असार मसान्तमा पुल निर्माणको काम सम्पन्न गर्नुपथ्यो । १ वर्ष म्याद थप भयो । गत वर्ष भत्किएकाले हाल जेठ मसान्तसम्म पुनः म्याद थप भएको छ ।

जेठ मसान्तसम्म काम बुझाउने गरेर काम गरेको भएपनि सफल हुन नसकेको कम्पनीका सुपरभाइजर निरोज रानाले बताए । उनले गत वर्ष पुलको तल पाइप मात्रै रहेको र बाढीको जोखिमका कारण यसपालि जाली उठाएर टेका लगाएपनि बाढी ठूलो भएकाले बगाएको रानाले बताए । पुल ५ करोड १७ लाख रुपैयाँको लागतका निर्माण सम्झौता भएको हो । पुल ५५ मिटर लामो रहेको छ । 

यसैगरी, रुरु गाउँपालिका र सत्यवती गाउँपालिका जोड्ने उल्लीखोलामा बन्दै गरेको पुलको निर्माण कार्य पनि प्रभावित भएको छ । बन्दाबन्दै अलपत्र परेको पुलको निर्माण कार्य शुरू भएको केही समयमै आएको बाढीले पुल निर्माणका लागि प्रयोग गरिने केही सामग्री बगाइदिएको छ । 

पुल निर्माणका लागि आवश्यक पर्ने उपकरण, पानी तान्ने पम्प बगाइदिएको स्थानीय युवा फर्सुराम श्रेष्ठले जानकारी दिए । पुल विगत ६ वर्षदेखि अलपत्र अवस्थामा छ ।

स्थानीयको लामो दबाब र मन्त्री प्रदीपकुमार ज्ञवालीले निर्माण कम्पनीसँग गरेको विशेष आग्रहमा बल्लतल्ल पुलको निर्माण शुरू भएको थियो ।