कोरोनाभाइरस संक्रमण फैलिँदै गर्दा एकथरीले तापक्रम बढेसँगै यो भाइरस पनि मर्छ वा संक्रमण कम हुन्छ भनेका थिए । 

तर तापक्रम बढेसँगै भाइरस घटेको वा मरेको प्रमाण फेला पर्न सकेको छैन । 

खासमा गर्मीमा कोरोना घट्छ भन्ने दाबी के कुरामा अडिएको थियो भने गर्मीमा कुनै व्यक्तिले खोक्दा वा हाच्छ्युँ गर्दा मुख वा नाकबाट निस्कने तरलकण भुइँमा वा अन्य कुरामा पर्दा तत्कालै सुक्छ र भाइरस त्यहीँ मर्छ । तर अहिलेसम्म यस्तो कुरा देखिएको छैन । 

उल्टो भुइँमा खसेको तरलकणमा भाइरस लामो समयसम्म बसिरहने भएकाले रसायन छर्किन भनिएको छ । 

त्यसो त संसारभरि अहिले फरक फरक तापक्रम छन् । अनि भाइरसै मार्ने किसिमको प्रचण्ड गर्मी लागिसकेको पनि छैन । मध्यगर्मीमा पनि भाइरस मर्ला भन्ने कुनै ग्यारेन्टी नरहेको विज्ञहरू बताउँछन् ।