सुदूरपश्चिम प्रदेशको सेती प्रादेशिक अस्पतालमा कोरोना भाइरस संक्रमणको उपचार गराइरहेका एक व्यक्ति मंगलवार डिस्चार्ज भएका छन् ।

कैलालीको धनगढी उपमहानगरपालिका–५ निवासी ३४ वर्षीय पुरुष उपचारपछि निको भएर डिस्चार्ज भएका अस्पतालले जनाएको छ ।

यसअघि सेतीमै उपचाररत लम्कीचुहा नगरपालिकाका २१ वर्षीय पुरुष आइतवार डिस्चार्ज भएका थिए । 

यससँगै नेपालमा उपचारपछि निको हुने संक्रमितको संख्या ५ पुगेको छ । यसअघि काठमाडौंमा २ जना र बाग्लुङमा १ जना उपचारपछि निको भइसकेका थिए ।

स्वास्थ्य तथा जनसंख्या मन्त्रालयका अनुसार हालसम्म नेपालमा ३२ जनामा कोरोना संक्रमण देखिएको छ भने ५ जना निको भएका छन् ।