बुटवलमा सुरक्षित खोप कार्यक्रम पनि शुरू भएको छ ।

आधारभूत स्वास्थ्य अन्तर्गत रहेको नियमित खोप सेवालाई अवरुद्ध हुन नदिन बुटवल उपमहानगरपालिकाले स्वास्थ्यकर्मीलाई पीपीइ लगाएर काममा खटाएको छ ।

बालबालिकाका लागि अत्यावश्यक र आधारभूत स्वास्थ्य सुरक्षाका लागि खोपको अति नै जरुरी पर्दछ । कोभिड–१९ को महामारी रोक्न लकडाउन भएपछि अन्यत्र रोकिएका बेला बुटवलले भने महामारीका विरुद्ध पूर्व तयारीसँगै थप सुरक्षाको उचित प्रबन्ध मिलाएर खोप कार्यक्रमलाई सञ्चालन गरेको छ ।

बालबालिकालाई निश्चित रोगबाट बचाउन अग्रिम दिइने एन्टिजोनलाई खोप भनिन्छ । एन्टिजोनहरू रोगविरुद्ध लड्ने प्रतिरोधात्मक क्षमता बढाउनका लागि निश्चित समयमा उमेर समूह अनुसार बच्चालाई लगाइन्छ । बुटवलमा अहिले लगाउन थालिएका सबै खोप विश्व स्वास्थ्य संगठनद्वारा मान्यताप्राप्त खोप हुन् ।

खोपको सुरक्षित कार्यक्रम सञ्चालन गर्न उपमहानगरपालिकामा रहेका नगर स्वास्थ्य केन्द्र र स्वास्थ्य चौकीमा पीपीई सहितका स्वास्थ्यकर्मी पालो बाँडेर खटिएका छन् । 

उनीहरूलाई प्रमुख शिवराज सुवेदीले स्वास्थ्य जस्तो संवेदनशील क्षेत्रमा कुनै पनि हेलचक्र्याइँ नगर्न र सुरक्षित रहेर सुरक्षित पार्न आग्रह निर्देशन दिएका छन् । उपमहानगरमा रहेका पीपीई लगाउँदै खोप कार्यक्रममा जुट्ने स्वास्थकर्मीलाई निर्देशन दिँदै प्रमुख सुवेदीले प्रभावकारी सेवा प्रवाहमा ध्यान दिन जरुरी रहेकोमा जोड दिए ।

विश्व अहिले कोरोना भाइरस संक्रमणको खोपका बालबालिकामा लगाइने बीसीजी र दादुरा रुबेला खोपमा अनुसन्धान गरिरहेको बेला बुटवलले नियमित शुरूआत गरेर सकारात्मक कामको थालनी गरेको छ ।

‘रोग प्रतिरोधात्मक क्षमता समेत बढाउने र बालबालिकाका लागि अतिजरुरी रहेको खोपलाई बन्द नगर्न जुनसुकै सुरक्षाको प्रबन्ध मिलाएर भएपनि सञ्चालन गर्नुपर्छ भनेर लागेका हौं,’ प्रमुख सुवेदीले भने । कोरोनामा देखिने लक्षण ज्वरो र श्वासप्रश्वास समस्याका लागि बीसीजी खोपलाई प्रभावकारी मानिएको छ । 

जन्मिने बित्तिकै लगाउनुपर्ने बीसीजीदेखि विभिन्न ८ प्रकारका खोपलाई बुटवलले निरन्तरता दिएको छ । नगरका शहरी स्वास्थ्य केन्द्र, सेमलार स्वास्थ्य चौकी र मोतिपुर स्वास्थ्य चौकीमा वैशाख १० गतेदेखि शुरू भएको खोप आउँदो १४ गतेसम्म सञ्चालन हुने गरी कार्यक्रम शुरू गरिएको बुटवलका प्रमुख प्रशासकीय अधिकृत चक्रपाणि शर्माले जानकारी दिए ।

यी स्थानमा खटिने प्राविधिक तथा प्रत्येक खोप सेसनमा जाने स्वास्थ्यकर्मीलाई पीपीई सहितका स्वास्थ्य सुरक्षाका सामग्रीको व्यवस्था मिलाइएको छ । पीपीई लगाएका २ जना स्वास्थ्यकर्मीले सुरक्षित तरिकाले खोप लगाउने गरी समयतालिका मिलाइएको र संयोजन स्वास्थ्य शाखाका प्रमुख कुन्दनकुमार सिंह नेतृत्वमा कर्मचारीले गरेका छन् ।

बीसीजी, पेन्टा, ओपीभी, एफआईपीभी, पीभीसी, एमआर तथा जेई र टीटी नामका खोप लगाउन शुरू गरिएको छ । यी खोप जन्मदेखि २३ महिनाको बच्चालाई लगाउनुपर्ने हुन्छ । कतिपय खोप १२ वर्षको बच्चासम्मलाई दिने खालका हुन्छन् । जन्मिएदेखि २३ महिना पुगेका उमेर समूहका बच्चाहरू हाल बुटवलमा झण्डै ६ हजार जना रहेको उपमहानगरको स्वास्थ्य शाखाको तथ्यांकमा छ । 

बुटवलमा हाल वर्षभरिमा ५५२ खोप सेसनहरू सञ्चालन हुँदै आएका छन् । यस क्षेत्रमा बीसीजी खोप ११ हजार ४०, डीपीटी हेप बी हिब १२ हजार ३८०, एमआर ११ हजार ६७० तथा टीटी १० हजार ५० र जेई ३ हजार ५११ जनाले वार्षिक रुपमा लगाउने गरेको स्वास्थ्य शाखाको तथ्यांकमा छ ।