स्थानीय र प्रहरीबीच पश्चिम नवलपरासीमा झडप भएको छ ।

सशस्त्र प्रहरीसँग विवाद हुँदा ३ जना स्थानीय घाइते भएका छन् । घाइतेमध्ये २ जनाको हात भाँचिएको छ ।

भारतसँग सीमाना जोडिएको पाल्हीनन्दन गाउँपालिका–५ भगतपुर गाउँमा बुधवार राति भएको विवादमा ६५ वर्षीय पूर्णमासी गौंड, १४ वर्षीय अखलेस गौंड र १७ वर्षीय मुन्ना गौड घाइते भएका छन् ।

घाइतेमध्ये पूर्णमासी र अखलेसको हात भाँचिएको छ भने टाउकोमा पनि चोट लागेको छ । पूर्णमासी र अखलेस हजुरबुबा र नाती हुन् । उनीहरूको दशगजा नजिक मदिरा पसल छ ।

लकडाउनको समयमा मोटरसाइकलमा राखेर मदिरा लैजाने क्रममा विवाद भएको सशस्त्र प्रहरीले जनाएको छ तर स्थानीयले भने घरबाट आफ्नै पसलमा झुल लिन जाने क्रममा अखलेसलाई कुटपिट गरेको जनाएका छन् ।

‘लकडाउनको समयमा पसल खोल्न नपाइएकाले घरबाट अखलेस झुल लिन पसल जाँदै थिए । एक्कासी सशस्त्र प्रहरीले कहाँ आएको भन्दै मोबाइल खोसेर अखलेसलाई कुटपिट गरे,’ पृथ्वीचन्द्र अस्पताल परासीमा उपचार गराइरहेका पूर्णमासीले भने ।

दशगजा हुँदै भारततर्फ मदिरा लिएर जाने क्रममा प्रहरीले रोक्दा स्थानीय जाइ लागेका सशस्त्र प्रहरी बल २६ नम्बर हेडक्वाटर नवलपरासीका उपरीक्षक भरत खनियाँले बताए । ‘मोटरसाइकलमा १ जना व्यक्ति जाँदै थिए । उनलाई रोक्न खोज्दा ती व्यक्ति मोटरसाइकल छाडेर आफूसँग भएको मदिरा सँगै लिएर गए । त्यसपछि उनले गाउँलेलाई बोलाएर पोस्टमाथि आक्रमण गर्न शुरू गरे,’ उनले भने ।

पोस्टमा ६ जना सशस्त्र प्रहरीले सीमामा निगरानी गर्दै आएका छन् । ‘डेढ–दुई सयको संख्यामा आएका स्थानीयले अस्थायी पोस्टमा आक्रमण गर्दै प्रहरीमाथि जाइ लागे । संख्या कम भएकाले थप बल पठाएर स्थिति नियन्त्रणमा लिएका हौं,’ उपरीक्षक खनियाँले भने । झडपमा केही व्यक्तिलाई चोट लागेको हुनसक्ने उनले बताए ।

मोटरसाइकल नियन्त्रणमा लिइएको सशस्त्र प्रहरीले जनाएको छ ।