कोरोना भाइरस संक्रमण रोकथाम र उपचारका लागि नेपाली सेनाले चीनबाट ल्याउने भनेको स्वास्थ्य सामग्री नेपाल पुग्न ढिलाइ हुने भएको छ ।

चीनमा सार्वजनिक बिदा परेकाले नेपालले चीनसँग सम्झौता गरेको स्वास्थ्य सामग्री आउन अझै १ हप्ता लाग्ने भएको हो ।

‘चाइनामा १ देखि ५ मेसम्म मजदुर दिवसको सार्वजनिक बिदा रहेछ जसले गर्दा जहाजबाट आउने भनिएको स्वास्थ्य सामग्री आउन अझै केही दिन लाग्ने देखिएको छ,’ नेपाली सेनाका प्रवक्ता सहायक रथी विज्ञानदेव पाण्डेले भने ।

कोरोना भाइरस (कोभिड–१९) संक्रमण परीक्षणको लागि आवश्यक पर्ने किट सेनाले वैशाख २३ गते मंगलवार ल्याउने कार्यतालिका थियो तर चीनको ग्वान्जावो एयरपोर्टमा पुगेको ३७ टन स्वास्थ्य सामग्री सेनाले ल्याउन सकेको छैन ।

विश्वभरका देशले स्वास्थ्य सामग्री ग्वान्जावो एयरपोर्टबाट लैजाने भएकाले ढिला हुने भएको छ । सेनाका अनुसार नेपाली सेनाको स्वास्थ्य सामग्री ल्याउने पालो ८१ औं नम्बरमा छ । 

५ मे (२३ गते) सम्म चीनमा सार्वजनिक बिदा थियो । पालो ८१ नम्बरमा परेकाले बुधवार, बिहीवार र शुक्रवार आउने सम्भावना नरहेको सेनाले जनाएको छ । शनिवार नेपालमा बिदा हुने र आईतवार चीनमा बिदा हुने भएकाले स्वास्थ्य सामग्री ल्याउने प्रक्रिया सोमवारबाट शुरू गर्दा अर्को बुधवार (वैशाख ३१) भन्दा अगाडि आउन सक्ने सम्भावना नरहेको सेनाले  जनाएको छ ।

‘ग्वान्जावो एयरपोर्टबाट विमानमा विश्वभर स्वास्थ्य सामग्री जाने भएका कारण एयर ट्राफिकको समस्या देखिएको छ । जसले गर्दा चीनले एयर ट्राफिक नियम बदल्ने देखिन्छ, त्यसैले स्वास्थ्य सामग्री ल्याउन समस्या देखिने छ,’ प्रवक्ता पाण्डेले भने, ‘वैकल्पिक एयरपोर्टबाट ल्याउन सकिन्छ कि भन्ने विषयमा पनि छलफल गरिरहका छौं । वैकल्पिक एयरपोर्टबाट ल्याउनको लागि पठाएको पत्रको जवाफ आइसकेको छैन ।’

नेपालमा संक्रमण फैलिरहेकाले ढुवानीमा सहजता मिलाइदिन परराष्ट्र मन्त्रालयमार्फत चीन सरकारलाई पत्रमार्फत आग्रह गरिएको छ । सेनाको आफ्नो सम्पर्क सूत्रबाट पनि पहल गरिराखेको प्रवक्ता पाण्डेले लोकान्तरलाई बताए ।
चीन सरकारले नेपाल सरकारको आग्रहलाई स्वीकारेर छिटो सामग्री ल्याउनका लागि सहयोग गर्ने विश्वास सेनाले लिएको छ तर सरकारी माध्यमबाट स्वास्थ्य सामग्री ल्याउने प्रक्रिया पत्रव्यवहारमै अल्झिएको छ ।

कोरोना भाइरसको संक्रमण परीक्षणका लागि आवश्यक पर्ने अत्यावश्यक सामग्रीलाई पहिलो प्राथमिकतामा राखेर ल्याउन लागेको सेनाले जनाएको छ । सडक यातायातबाट आउने परीक्षण किट, पीपीई लगायतका अत्यावश्यक सामग्रीलाई पहिला प्राथमिकतामा राखेर ट्रकहरूको वर्गीकरण गरी ल्याउन लागेको प्रवक्ता पाण्डेले बताए ।

सेनाले हवाइ ढुवानीको लागि फल्याट फ्री कम्पनीलाई ३ लाख ७२ हजार ५०० डलर (४ करोड ५१ लाख ३९ हजार ५ सय) हवाइ भाडा उपलब्ध गराइसकेको सैनिक प्रवक्ता पाण्डेले बताए । 

‘हामीले हवाईजहाजमार्फत छिटो सामान ल्याउनको लागि फल्याट फ्री कम्पनीलाई ३ लाख ७२ हजार डलर भुक्तानी दिइसकेका छौं,’ पाण्डेले लोकान्तरसँग भने ।

सडक यातायातबाट ल्याउन २ करोड ७६ लाख ४० हजार ४०० रुपैयाँ भुक्तानी गरिएको छ । सडक यातायातबाट आउने स्वास्थ्य सामग्री संकलन भइसकेको र आइतवार हिँड्ने तालिका भनिएपनि हालसम्म जानकारीमा नआएको सैनिक प्रवक्ता पाण्डेले बताए ।

ओम्नी बिजनेश कर्पोरेसन इन्टरनेसनलसँग भएको सम्झौता विवादमा आएपछि सरकारले चैत १६ गते स्वास्थ्य सामग्री खरिदको जिम्मा सेनालाई दिएको थियो । जीटूजी (सरकार–सरकार) प्रक्रियाबाट नेपालमा ३४२ टन स्वास्थ्य सामग्री ल्याउने गरी वैशाख पहिलो हप्ता चीनसँग सेनाले सम्झौता गरेको थियो ।

चाइना सिनोफर्म कम्पनीको प्लान्ट चीनका विभिन्न क्षेत्रबाट सेनाले ६७ प्रकारका स्वास्थ्य सामग्री ल्याउँदैछ ।

शुरूमा पर्सनल प्रोटेक्टिभ इक्युपमेन्ट (पीपीई), एन–९५ मास्क, पीसीआर परीक्षणका लागि आवश्यक सामग्री लगायत ल्याइँदैछ । सेनाले चीनबाट स्वास्थ्य सामग्री खरिदका लागि २ अर्ब २५ करोड बढीको सम्झौता गरेको छ ।