५ नम्बर प्रदेशको क्राइसिस म्यानेजमेन्ट सेन्टरले आवश्यकताका आधारमा नेपाली सेना र नेपाल प्रहरीको अस्पताललाई प्रयोग गर्ने निर्णय गरेको छ ।

बुुधवार मुुख्यमन्त्री शंकर पोखरेलको अध्यक्षतामा बसेको बैठकले कोरोना भाइरसको उपचारका लागि उपचारका लागि क्षमता विस्तार गर्नुपर्ने देखिएकाले बाँकेको नेपालगञ्जस्थित नेपाली सेनाको अस्पताल र नेपाल प्रहरीको अस्पताललाई समेत आवश्यकता अनुसार प्रयोग गर्ने निर्णय भएको मुख्यमन्त्रीको सचिवालयले जनाएको छ ।

प्रदेशमा कोरोना भाइरस संक्रमणको अवस्था हेरी क्षमता विस्तारका साथै थप आइसोलेसन अस्पतालको योजना सामाजिक विकास मन्त्रालयले तयार गर्नुपर्ने जिम्मेवारी समेत सामाजिक विकास मन्त्रालयलाई दिइएको छ ।

नेपालगञ्जमा कोरोना भाइरसको बढी प्रभाव देखिएकाले परीक्षणको दायरा बढाउन आवश्यक किट, स्वास्थ्य सामग्री, पर्सनल सेक्युरिटी इक्वीपमेन्ट, औषधि उपलब्ध गराउन सामाजिक विकास मन्त्रालयले आवश्यक संयोजन गर्ने निर्णय भएको मुख्यमन्त्रीका प्रेस सल्लाहकार शेरबहादुर केसीले बताए ।

भाइरसका शंकास्पद बिरामीको पीसीआर परीक्षणलाई जोड दिने तथा भारतबाट आउनेको हकमा आइसोलेसन शय्या भएका अस्पतालमा राखी स्वाब संकलनको व्यवस्था मिलाउने निर्णय गरेको छ । नेपाल–भारत सीमा क्षेत्रको सुरक्षा सम्बन्धी जनशक्ति, आवश्यक सामग्री र आवास लगायतको व्यवस्थापनबारे आन्तरिक मामिला तथा कानून मन्त्रालयले गृह मन्त्रालयसँग आवश्यक समन्वय गरी कार्ययोजना तयार गर्ने निर्णय भएको सल्लाहकार केसीले बताए ।