सुदूरपश्चिममा कोरोना परीक्षण किटको चरम अभाव, शंकास्पदको नमूना संकलन प्रभावित

लखन चाैधरी
लखन चाैधरी

लखन चौधरी लोकान्तरका लागि सुदूरपश्चिम प्रदेश प्रतिनिधि हुन् । 

सुदूरपश्चिम प्रदेशमा कोरोना भाइरस (कोभिड १९) संक्रमण परीक्षण किटको चरम अभाव भएको छ ।

सरकारले समयमै आपूर्ति गर्न नसक्दा किटको चरम अभाव सिर्जना भएको हो । पीसीआर किटसँगै आरडीटीको समेत अभाव भएको छ ।


Advertisement

किटको अभाव भएपछि सेती प्रादेशिक अस्पताल धनगढीमा उपचारपछि निको भएर घर फर्केका बिरामीको पुनः परीक्षण समेत गर्न सकिएको छैन । काठमाडौं र वीरगञ्जमा निको भएका संक्रमितको पुनः परीक्षण गर्दा कोरोना ‘पोजेटिभ’ देखिएको अवस्थामा धनगढीमा निको भएका संक्रमितको पुनः परीक्षण हुन सकेको छैन । सेती प्रादेशिक अस्पतालमा रहेका ५ जना कोरोनाका बिरामीमध्ये हालसम्म ४ जना उपचारपछि घर फर्केका छन् ।

सुदूरपश्चिमका विभिन्न जिल्लामा क्वारेन्टाइनमा राखिएका व्यक्तिको समेत कोरोना परीक्षण रोकिएको छ । संक्रमितको लगातार २ पटक कोरोना रिपोर्ट नेगेटिभ आएपछि १ हप्तासम्म होम क्वारेन्टाईनमा बस्नुपर्ने र ७ देखि १० दिनको अवधिमा पुनः परीक्षण गर्नुपर्ने मापदण्ड भएपनि पुनः परीक्षण हुन नसकेको हो ।


Advertisement

सुदूरपश्चिम स्वास्थ्य निर्देशनालयका निर्देशक डा. गुणराज अवस्थीले सुदूरपश्चिममा मात्रै नभई देशभर किटको अभाव भएको बताए । आपूर्तिको लागि पहल जारी रहेको बताउँदै उनले केहीदिनमै आपूर्ति सहज हुने उनको भनाइ छ ।

नेपालमा आरडीटीबाट प्रारम्भिक परीण गरिँदै आएको छ भने कोरोना भए/नभएको यकिन गर्न पीसीआर मशिनबाट परीक्षण हुँदै आएको छ । मोलेकुलर माइक्रोबायोलोजिस्ट सुनिल लेखकका अनुसार पीसीआर अन्तर्गत पीसीआर किट र आरएनए एक्पेक्सन किट प्रयोग हुँदै आएको छ । पीसीआर किटको उपलब्धता भएपनि एक्पेक्सन किटको अभाव भएपछि परीक्षण कार्य प्रभावित भएको छ ।

परीक्षण कार्य प्रभावित भएपछि कोरोनाको आंशकामा आइसोलेसन र क्वारेन्टाइनमा राखिएकाहरू अप्ठ्यारोमा परेका छन् । कैलालीको लम्कीचुहा नगरपालिका–७ का वडाध्यक्ष हरिराम चौधरीले कोरोना संक्रमण भएका व्यक्ति उपचारपछि घर फर्केका तर उनीसँगै क्वारेन्टाइनमा बसेका अन्य व्यक्तिको परीक्षण नहुँदा जोखिम बढेको बताए ।

सो नगरपालिकाको वडा नम्बर ७ र ९ को लागि सरस्वती मावि प्रतापुरको क्वारेन्टाइनमा हालसम्म १०० बढीलाई राखिएको थियो तर अझैसम्म २३ जनाको १५ दिन बितेपनि कुनै पनि परीक्षण हुन नसक्दा न त उनीहरूलाई घर पठाउन सकिएको, न त कुनै उपचार दिन सकेको वडाध्यक्ष चौधरीले दुःखेसो सुनाए ।

लखन चाैधरी
लखन चाैधरी

लेखकबाट थप...

कमेन्ट गर्नुहोस्