नेपालगञ्जमा एकैदिन हजार जनाको स्वाब नमूना संकलनको तयारी गरिएको छ ।

स्वाब संकलनदेखि आरटीपीसीआर यन्त्रमा कोरोना परीक्षणका लागि लागि आवश्यक पर्ने भीटीएम र रिएजेन्ट्स लगायतको कीट पर्याप्त आएकाले शनिवार ठूलो संख्यामा स्वाब संकलन गरी परीक्षणमा लैजाने तयारी भएको जिल्ला स्वास्थ्य कार्यालय बाँकेका अधिकृत एवं कोरोनाका फोकलपर्सन नरेश श्रेष्ठले जानकारी दिए ।

उनका अनुसार नेपालगञ्जमा कोरोना संक्रमितको संख्या बढ्दै गएपछि सरकारले परीक्षणको दायरा बढाउन २ हजार टेस्ट किट र १ हजार भीटीएम पठाएको छ । एउटै वडामा २३ र नजिकको अर्को वडामा एका संक्रमित देखिएपछि सरकारले नेपालगञ्जमा परीक्षणको दायरा बढाउन निर्देशन दिएको छ ।

नेपालगञ्जमा २४ जनामा कोरोना देखिएपछि धेरैभन्दा धेरै जनाको परीक्षण गर्न जनस्तरबाट माग बढेको छ । पर्याप्त टेस्ट किट र भीटीएम आएकाले एकान्तबास, मन्दिर र मस्जिद तथा संक्रमितको सम्पर्कमा रहेका सबैलाई परीक्षण गर्ने तयारी भएको छ ।

भेरी अस्पताल नेपालगञ्जमा दिनमा सय जनासम्मको परीक्षण हुने बताइएको छ । शनिवार एकैदिन हजार जनाको स्वाब संकलन भएमा काठमाडौं लैजानका लागि नेपाली सेनाको जहाज नेपालगञ्जमै राखिएको छ ।

भेरी अस्पताल नेपालगञ्जका प्रमुख डा. प्रकाश थापाले बाँकेमा सरकारले उच्च प्राथमिकताका साथ आवश्यक उपकरण पठाएकाले स्वाब संकलन तथा परीक्षणमा कुनै अवरोध नहुने बताउँदै शनिवार ठूलो संख्यामा स्वाब संकलन गर्ने तयारी भएको जानकारी दिए ।