पश्चिम नवलपरासीको सुनवल नगरपालिकाले सञ्चालन गरेको क्वारेन्टाइन व्यवस्थापनमा स्थानीयले सहयोग गरेका छन् । 

अधिकांश स्थानीय तहहरूले होटल तथा अन्य व्यक्तिहरूलाई प्रति छाकका दरले रकम उपलब्ध गराएर क्वारेन्टाइनमा बस्नेहरूका लागि खाना र नास्ताको व्यवस्था गर्दै आएका छन् । तर सुनवलका स्थानीयले भने स्वत स्र्फुत रुपमा निःशुल्क रुपमा खाना पकाउनेदेखि तरकारी र नगद सहयोग गर्दै आएका छन् । यसले नगरपालिकाको आर्थिक बोझलाई कम गराएको छ ।

स्थानीय कारेश्वर मन्दिर व्यवस्थापन समितिले दैनिक रुपमा खाना र नास्ता पकाएर खुवाउने गरेको छ । भने हरेक दिन पालो मिलाएर स्थानीयहरूले तरकारी उपलब्ध गराउने गरेको क्वारेन्टाइन व्यस्थापन समितिका संयोजक एंव वडा नं. ४ का अध्यक्ष विर बहादुर गुरुङले बताए । केही स्थानीयहरूले नगद रकम समेत उपलब्ध गराएका छन् ।

अहिले नगरपालिकाले चामल बाहेक अन्य सामाग्री उपलब्ध गराउन नपरेको उनले बतााए । क्वारेन्टाइनमा बस्नेहरूका लागि बिहान र दिउँसोको नास्तासहित खानाको व्यवस्था गरिएको छ । ‘ केही स्थानीयहरूले नगद रकम उपलब्ध गराउँदै आउनु भएको छ । उक्त रकमबाट मासुलगायत अन्य सामान खरिद गरेका छौं ।’ एक जनाले तरकारी उपलब्ध गराएपछि अर्को दिन अर्का स्थानीयले  उपलब्ध गराउँदै आएका छन्,’ अध्यक्ष गुरुङले भने । 

पश्चिम नवलपरासी भारतसँग सीमाना जोडिएको जिल्ला हो । भारतबाट हरेक दिन जिल्लामा आउने स्थानीयहरूको संख्या बढ्दै जाँदा समस्या थपिएको नगर प्रमुख भीम बहादुर थापाले बताए । महाकवी देवकोटा क्याम्पसमा स्थापना गरिएको क्वारेन्टाइनमा हाल २२ जना छन् । उनीहरू सबै भारतबाट आएका हुन् । उक्त क्याम्पसमा २ सय जना राख्न सकिने गरी व्यवस्था मिलाइएको छ । हरेक दिन संख्या बढ्दै गएपछि नगरपालिकाले प्रतेक वडामा रहेका सामुदायिक भवन र विद्यालयलाई क्वारेन्टाइनमा परिणत गराउने सोँच राखेको छ ।

‘जिल्लामा हरेक दिन संख्या बढ्ेको देख्दा अहिले स्थापना गरिएका क्वारेन्टाइनले थेग्न नसक्ने देखिएको छ । त्यसैले नगर क्षेत्रमा रहेका सामुदायिक भवन र विद्यालयहरूमा उनीहरूलाई व्यवस्थापन गर्नका लागि छलफल चलाएका छौं । नगर क्षेत्रमा ५ हजार जना राख्न सकिने गरी क्वारेन्टाइको व्यवस्थापनका लागि पहल सुरु भएको छ,’ नगर प्रमुख थापाले भने,‘संख्या बढ्दै गयो भने नगरपालिका एक्लैले व्यवस्थापन गर्न सक्दैन । अहिलेसम्म नगरपालिकाले सबै व्यवस्था गरेको छ । अब संख्या बढ्दै गएमा सम्बन्धित व्यक्तिले बेड र ओड्ने ओछ्याउने आफैं ल्याउन लगाउछौं । खानाको व्यवस्था नगरपालिकाले गर्छ,’ उनले भने ।

सोमवारसम्म जिल्लाका ७ स्थानीय तहमा रहेका क्वारेन्टाइनमा बस्नेको संख्या २ सय २८ पुगेको स्वास्थ्य कार्यालयका प्रमुख गौरव ढकालले जानकारी दिए ।