भारतका विभिन्न शहरमा मजदुरी गर्ने नेपाली वैधानिक रुपमा प्रवेश नपाएपछि लुकीछिपी नेपाल आएका छन् ।

नेपालबाट भारत जाने र भारतबाट नेपाल आउने २ देशका नागरिकलाई जहाँको त्यहीँ राख्ने सहमति भएपनि सीमा क्षेत्रमा खटिएका भारतीय सुरक्षाकर्मीले नेपालीलाई निर्वाध रुपमा पठाउने गरेको पाइएको छ ।

जसले गर्दा सीमावर्ती जिल्लाका जंगल, खेत र झाँडी हुँदै नेपालीहरू नेपाल प्रवेश गरिरहेका छन् । नेपाली प्रशासनले समेत लुकीछिपी आउनेलाई रोक्न सकेको छैन ।

लुकीछिपी नेपाल प्रवेश गर्ने क्रम ५ नम्बर प्रदेशसँग जोडिएका ६ जिल्लामा अझै बढी छ । जसले गर्दा तराई क्षेत्र कोरोना भाइरसको उच्च जोखिम अर्थात् ‘हट स्पट’ बन्ने खतरा देखिएको छ । देशभर संक्रमितको संख्या १९१ पुग्दा ५ नम्बर प्रदेशमा ७० जना संक्रमित छन् । जुन देशभरका कूल संक्रमितको एकतिहाइभन्दा बढी हो । बाँके २४, कपिलवस्तु २९, रुपन्देही १६ र बर्दियामा १ जना संक्रमित छन् ।

रुपन्देहीका संक्रमित मुम्बई र दिल्लीबाट आएका

मुम्बई र दिल्लीबाट आएका रुपन्देहीको सम्मरीमाई गाउँपालिका र लुम्बिनी सांस्कृतिक नगरपालिका संक्रमण पुष्टि भएका ६ युवाहरू मुम्बई र दिल्लीबाट आएको खुलेको छ । संक्रमित ६ जनामध्ये ५ जना सम्मरीमाई गाउँपालिका १ नम्बर वडाका र २ जना ४ नम्बर वडाका हुन् । लुम्बिनी सांस्कृतिक नगरपालिकाका २ जना हुन् । 

रुपन्देहीका प्रहरी प्रमुख हेम थापाले संक्रमित युवा ५ दिन अगाडि भारतको मुम्बईबाट आएका बताए । उनले भने, ‘भारतमा लकडाउन खुकुलो भएसँगै उनीहरू गाडी, ट्रक हुँदै सीमाना आएर नेपाल प्रवेश गरेका हुन् । उनीहरूलाई स्थानीय प्रशासन र उनीहरूलाई समातेर क्वारेन्टाइनमा राखेका थिए ।’

सीमानाकामा ठूलो मात्रामा नेपाली पुगेका छन् । प्रहरी प्रशासनले सीमामा कडाइ गरेको बताएपनि नेपाल छिर्ने क्रम बढ्दै गएको छ । रुपन्देहीको कोटहीमाईका १ युवामा पनि १ हप्ताअघि कोरोना पुष्टि भइसकेको छ । दिल्लीबाट आएका उनी पनि लुकीछिपी नेपाल प्रवेश गरेका थिए ।

कपिलवस्तुका संक्रमित महाराष्ट्रबाट आएका

कपिलवस्तुमा पछिल्लो पटक संक्रमण पुष्टि भएका युवा भारतको महाराष्ट्रबाट आएका खुलेको छ । भारतको सबैभन्दा बढी कोरोना संक्रमण भएको प्रान्त महाराष्ट्र हो । कपिलवस्तु प्रहरी प्रमुख दिपशम्शेर राणाले सोमवार साँझ पत्ता लागेका सबै युवाहरू महाराष्ट्रबाट आएकाहरू रहेको बताए । ‘सोमवार थप भएका संक्रमित कपिलवस्तुको यशोधराका गाउँपालिका वडा नम्बर ८ र बुद्धभूमि नगरपालिका वडा नम्बर ७ निवासी १५, १९, २३, ३०, ३२ र ३८ वर्षीय पुरुष हुन् । उनीहरू भारतबाट लुकेर जिल्ला छिरेका हुन् ।’

कपिलवस्तुमा धमाधम बिरामी भेटिएपछि सोमवार साँझदेखि जिल्ला शिल गरिएको छ । सोमवार बिहान १० जना संक्रमण पुष्टि भएका पनि भारतबाट आएका युवाहरू थिए । 

क्वारेन्टाइन व्यवस्थापनमा स्थानीयको अवरोध 

स्थानीय तहमा कोरोनाको त्रासले स्थानीयले क्वारेन्टाइन सञ्चालनमा समेत अवरोध गर्न थालेका छन् । रुपन्देहीको मायादेवी गाउपालिमा भारतबाट आएकालाई नजिकै राख्दा कोरोना सर्नसक्ने भन्दै मायादेवी गाउँपालिका ३ नम्बर वडाको बरेवा माविमा क्वारेन्टाइन सञ्चालनमा स्थानीयले अवरोध गरेको गाउँपालिकाका अध्यक्ष धु्रवनारायण चौधरीले बताए ।

अध्यक्ष चौधरीका अनुसार लकडाउनकै समयमा भारतबाट आएका ७२ जनालाई १ नम्बर वडास्थित जनजागृति विद्यालयमा व्यवस्थापन गरिएको थियो । उनीहरूमध्ये १० जनालाई अन्य सथानमा व्यवस्थापन गर्ने गरी वरेवा माविलाई क्वारेन्टाइन बनाउने योजनामा गाउँपालिका लागेको थियो । ५० जना क्षमता भएको जनजागृति विद्यालयमा अहिले ७२ जना राखिएको छ । बाँकीको व्यवस्थापन गर्न वरेवा माविलाई क्वारेन्टाइन बनाउन पहल भइरहेको अवस्थामा केही व्यतिmले राजनीति गरेर स्थानीयलाई उक्साएको अध्यक्ष चौधरीले गुनासो गरे ।

भारतले विना रोकतोक नेपाली पठाउँदै

भारतीय सुरक्षाकर्मीले विना रोकतोक नेपालीलाई पठाउँदा पश्चिम नवलपरासीमा कोरोना जोखिम बढेको छ । भारतीय सुरक्षाकर्मीले धमाधम नेपाल पठाउन थालेपछि हप्तादिनको अवधिमा क्वारेन्टाइनमा बस्नेको संख्या दोब्बरले वृद्धि भएको छ । भारतीय सुरक्षाकर्मीले निर्वाध नेपाल पठाउने गरेका कारण समस्या उत्पन्न भएको पश्चिम नवलपरासीका प्रमुख जिल्ला अधिकारी बासुदेव दाहालले बताए ।

सोमवार मात्रै नवलपरारीको सीमा क्षेत्रका दशगजामा १०० भन्दा बढी नेपाली अलपत्र परेर बसेको उनले बताए । रुपन्देहीमा १ हजार र कपिलस्तुमा ४ हजार नेपाली विभिन्न नाकामा अलपत्र छन् ।

नेपालबाट भारत जान खोज्ने र भारतबाट नेपाल आउन खोज्नेलाई भारत सरकारले मजदुरका लागि ट्रेन (रेल) सञ्चालन गरेको छ । त्यहाँबाट नेपाली सीमासम्म डिपो गाडी (सरकारी बस) सञ्चालन गरेको छ । त्यसले गर्दा नेपाली धमाधम घर फर्कन थालेका छन् । 

सोमवार दिउँसो करीब १ बजेतिर ३०० बढी नेपाली सीमा नाका बेलहिया प्रवेश गर्न खोजेपछि सुरक्षाकर्मी केही समय तनावमा परेका थिए । भारतीय सुरक्षाकर्मीले समन्वय गरेर भारततर्फ नै फर्काउन सहमत भएपछि सहज भएको थियो । भारतका विभिन्न स्थानबाट आएका नेपालीलाई भारतीय प्रहरीले तापक्रम नापेर नेपालबाट फर्किएका खाली ट्रकमा लोड गरेर क्वारेन्टाइनमा फर्काएको छ ।

भारतको गाजियावादबाट आएकी धादिङकी ६ महिनाकी सुत्केरी मिना तामाङले दुःखेसो पोख्दै भनिन्, ‘भारतका प्रधामन्त्री नरेन्द्र मोदीले आफ्ना नागरिकलाई स्वदेश ल्याएझै हामी पनि सिमानासम्म पुगे । सरकारले हामीलाई घरसम्म पुग्न गाडीको व्यवस्था गर्ला भनेर खुशी भएका थियौं तर यहाँ त ट्रकमै कोचेर भारततर्फ नै फर्काइदियो ।’