लामो समय रोकिएपछि आफ्नै भूमिमा फर्किने तयारीमा नेपाली तथा भारतीय

लखन चाैधरी
लखन चाैधरी

लखन चौधरी लोकान्तरका लागि सुदूरपश्चिम प्रदेश प्रतिनिधि हुन् । 

लामो लकडाउनपछि भारतमा रहेका नेपाली र नेपालमा रहेका भारतीयहरूलाई फर्काउने तयारी भएको छ ।

कोरोनाको महामारीपछि जारी लकडाउनका कारण जो जहाँ छ, त्यहीँ व्यवस्थापन गर्ने नेपाल र भारत सरकारबीच भएको सहमतिपछि लामो समयसम्म सीमा वारिपारि फसेका नागरिकहरू आ–आफ्नै देश फर्किने तयारीमा छन् ।


Advertisement

भारतको सरकारको आग्रहमा कैलालीमा रहेका भारतीय नागरिकहरूलाई भारत पठाउने तयारी थालिएको हो ।

काठमाडौंस्थित भारतीय दूतावासको आग्रहमा कैलालीका विभिन्न स्थानमा रहेका भारतीय नागरिकहरूको नामावाली संकलन गरिरहेको जिल्ला प्रशासन कार्यालय कैलालीले उनीहरूलाई भारत पठाउने प्रक्रिया थालिएको बताएको छ ।


Advertisement

जिल्ला प्रशासन कार्यालय कैलालीका प्रवक्ता तथा प्रशासकीय अधिकृत शिवराज जोशीले आजसम्म विभिन्न स्थानीय तहमा रहेका ८ सय बढी भारतीयको नामावली संकलन भइसकेको र आवश्यक प्रक्रिया पूरा भएपछि उनीहरूलाई भारत पठाइने बताए ।

टीकापुरमा रहेका २६ र जोशीपुरमा रहेका ४ जना भारतीय नागरिकलाई शुक्रबार धनगढी ल्याइएको छ ।  

उनीहरूलाई धनगढीको त्रिनगर माध्यामिक विद्यालयमा राखिएको छ । त्रिनगरमा १०३ जना भारतीय नागरिक पहिलेदेखि नै क्वारेन्टाइनमा छन् ।

जिल्लाभरिका नामावली संकलन पूरा भइसकेपछि भारतीय नागरिकहरूलाई भारत पठाइने जोशीले बताए ।

१८० जना नेपाली पलियाबाट फर्किँदै

यसैबीच सीमावर्ति भारतीय बजार पलियामा ४९ देखि क्वारेन्टाइनमा रहेका नेपालीहरूलाई पनि शुक्रबार नेपाल प्रवेश गराउने पहल भएको छ ।

पलियामा कैलालीका ७५, कञ्चनपुरका ५१, बैतडीका १९, डडेल्धुराका १५, सुर्खेतका ८ बझाङका ३, डोटीका ३, दैलेखका २ जना, कास्की, सिन्धुली, रौतहटका एक/एक गरी एक सय ८० जना रहेका छन्, जसमध्ये ४ जना महिला र ३ जना बालबालिका रहेका छन् ।

उनीहरूले उद्धारका लागि आग्रह गर्दै आएपनि गृहमन्त्रालयको अनुमति नपाउँदा उद्धार हुन  सकेको थिएन । स्थानीय प्रशासनको लामो समयको प्रयासपछि उनीहरूको शुक्रबार उद्धार हुन लागेको हो ।

उनीहरूको उद्धारको विषयमा बिहीवार मुख्यमन्त्री त्रिलोचन भट्ट, धनगढी उपमहानगरपालिकाका प्रमुख नृपबहादुर वड, प्रमुख जिल्ला अधिकारी यज्ञराज बोहोराका बीचमा छलफल भएको थियो ।

उनीहरूको साँझसम्म उद्धारका लागि पहल भइरहेको प्रशासनले जनाएको छ । त्यसका लागि भारतको खिरी जिल्लाका अधिकारीसँग छलफल भइरहेको बताइएको छ ।

लखन चाैधरी
लखन चाैधरी

लेखकबाट थप...

कमेन्ट गर्नुहोस्