स्वाब संकलन गर्ने सेनाका चिकित्सकसँगै पृतनापति पनि संक्रमित

ब्यारेक सील, २ हजार जति सेना ब्यारेक भित्र थुनिए

अजय अनुरागी
अजय अनुरागी

अजय अनुरागी लोकान्तरका लागि खोज, राजनीति र समसामयिक विषयवस्तुमा कलम चलाउँछन् ।

कोरोना संक्रमित नेपाली सेनाको पृतनापति तथा सेनाकै संक्रमित एक जना चिकित्सकलाई उपचारका लागि काठमाडौं पठाइएको छ ।  

जिल्ला प्रशासन कार्यालय महोत्तरीका प्रमुख जिल्ला अधिकारी (सीडिओ) सूर्य बहादुर खत्रीका अनुसार संक्रमित दुबै जनालाई काठमाडौं स्थित सशस्त्र प्रहरीको आइसोलेसन अस्पतालमा उपचार भइरहेको छ ।  शनिवार साँझ ६ बजे दुबै जनालाई सेनाको गाडीमा नै राखेर काठमाडौं पठाइएको थियो । 


Advertisement

महोत्तरीको बर्दिबास नगरपालिकाको किसाननगरमा अवस्थित रहेको मध्य पुर्बी पृतनाका ५२ बर्षीय सहायक रथि सरह रहेका पृतनापतिमा संक्रमण पुष्टि भएको हो । सिडिओ खत्रीका अनुसार अर्को संक्रमित सेनाका एमबीबीएस चिकित्सक हुन् । उनी प्रदेश २ का बिभिन्न जिल्लामा कोरोना संदिग्ध ब्यक्तिहरूको स्वाब संकलनका लागि जाने गर्थे । नेपालमा स्वाब संकलन गर्न जाने पहिलो व्यक्तिमा संक्रमण देखिएको हो । 

‘बिरगंज, जनकपुर सहित बिभिन्न जिल्लाका क्वारेनटाइनमा उक्त चिकित्सक तथा पृतनापति पनि जानु भएको रहेछ,’  सिडिओ खत्रीले लोकान्तरसँग भने,‘अब अहिले देखि उहाँहरूको कंटयाक्ट ट्रेसिंगको काम शुरू गरेका छौं । ’
तत्काल उक्त सेनाको ब्यारेक सील गरिएको छ । ‘सेनामा आफैं पनि कडा अनुशासन हुन्छ,’ सिडिओ खत्रीले भने,‘ब्यारेक भित्रका कुनै पनि सेनालाई बाहिर आउन वा हिडडुल गर्न प्रतिबंध लगाइएको छ । ’ त्यसका बाहेक ब्यारेक भित्र पनि रहेका सेनालाई सामाजिक दूरी कायम गर्न भनिएको उनले बताए । 


Advertisement

स्वाब संकलन गर्न जाने सेनाका चिकित्सकमा नै कोरोना संक्रमण भएका कारण सिंगो प्रदेश नै उच्च जोखिममा परेको छ । साथै संक्रमित पृतनापति पनि बिरगंज देखि जनकपुर सम्म आउजाउ गरेका कारण जोखिम बढेको छ । 

ब्यारेकमा रहेका एक जना सेनाका अनुसार ब्यारेक भित्रका सबै सेनाहरू त्रसित भएका छन् । पृतनापति र उक्त चिकित्सकको सम्पर्कमा ब्यारेक भित्र नै धेरै जना सेनाहरू आएको कारण पनि ब्यारेक भित्रका सेनाहरू त्रसित भएका छन् । उक्त पृतना भित्र करीब २ हजार जति सेनाका कर्मचारीहरू छन् ।  

सिडिओ खत्रीका अनुसार त्यहाँ ब्यारेक भित्र अस्पताल,बिद्यालय समेतका संरचनाहरू निर्माणाधिन रहेको छ । उक्त ब्यारेक भित्र एक गण, एक गुल्म, सिग्नल गण, मेडिकल गण, बिद्यालय गण सहित पृतनाका समेत सेना गरेर २ हजारको हाराहारीमा सेना रहेका छन् ।     
 

अजय अनुरागी
अजय अनुरागी

लेखकबाट थप...

कमेन्ट गर्नुहोस्