कर्णाली सरकारले प्रदेशवासीलाई भित्र्याउँदा बबई नाकामा अनिवार्य रुपमा आरडीटी जाँच गरेर सम्बन्धित पालिकामा पठाउने तयारी गरेको छ ।

त्यसका लागि बिहीवार सामाजिक विकास मन्त्री दल रावल, आन्तरिक मामिला तथा कानूनमन्त्री नरेश भण्डारीसहित सुरक्षाकर्मीको टोली बबईमा आवश्यक जग्गाको खोजीमा पुगे ।

विभिन्न संघसंस्थाले उपलब्ध गराएका तथा नेपालगञ्ज र सुर्खेतबाट थप टेन्ट र आवश्यक स्वास्थ्य सामग्री लिएर पुगेको मन्त्रीसहित टोलीले खाली जग्गा नभेटिएपछि सामग्रीहरू नेपाली सेनाको जिम्मा लगाएर फर्किएका छन् ।

कर्णाली भित्रिनेको आरडीटी परीक्षण नाकामा नै गरेर सम्बन्धित पालिकामा पठाउने योजनामा सरकार जुटेको छ । निकुञ्ज क्षेत्रभित्र पर्ने बबईमा आवश्यक १०० टेन्ट निर्माणका लागि खाली जग्गा नभेटिएपछि अब छिन्चुस्थित मदाने चौर र स्कूलमा परीक्षण कक्ष स्थापना गर्न लागिएको छ ।

सरकारले बबईमा डाक्टरसहितको टोली खटाएर तत्काल आरडीटी र सम्भव भएसम्म पीसीआर परीक्षण गर्ने तयारी गरिरहेको थियो । बाँकेमा भारतबाट आएका नागरिकको क्वारेन्टाइनमा मृत्यु भएपछि कर्णाली भित्रने नागरिकको बबईमा परीक्षण गरेर मात्रै पालिकाले बनाएको क्वारेन्टाइन पठाउने गृहकार्य गरिएको छ ।

‘नाकामा परीक्षण गरेर रिपोर्ट नेगेटिभ आएकालाई सम्बन्धित पालिकाको क्वारेन्टाइन पठाइनेछ,’ सामाजिक विकास मन्त्री दल रावलले भने, ‘यदि परीक्षणका क्रममा रिपोर्ट पोजेटिभ आए तत्काल प्रदेश अस्पताल वा प्रदेश ५ लैजाने गरी नाकामा नै परीक्षण गर्ने योजना सरकारको छ ।’

भारतबाट कर्णाली आउनेको संख्या बढ्दै गएकाले बबईमा परीक्षण कक्ष बनाउने योजनामा रहेपनि जग्गा नभेटिएको मन्त्री रावलले बताए । उनका अनुसार बबईमा जग्गा नभेटिएपछि वैकल्पिक रुपमा छिन्चुस्थित विद्यालय र खाली जग्गामा व्यवस्थापन गरिने छ । 

‘क्वारेन्टाइन होइन, परीक्षण कक्ष बनाउन खोजेका हौं,’ आन्तरिक मामिला तथा कानून मन्त्री नरेश भण्डारीले भने । उनले बबईमा क्वारेन्टाइन नभइ परीक्षण कक्ष व्यवस्थापन गर्न लागेको जानकारी दिए । नाकामा आउनेको तत्काल त्यहीँ परीक्षण गर्ने गरी सहायता वा परीक्षण कक्ष बनाउन लागेको मन्त्री भण्डारीले बताए । ‘रिपोर्ट आउन केही समय लाग्ने भएकाले बस्न असहज नहोस् भन्ने उद्देश्यले सहायता कक्ष बनाउन लागेका हौं,’ मन्त्री भण्डारीले भने, ‘एक्कासी धेरै संख्यामा आउँदा उहाँहरूलाई बस्न र खानको समस्या हुने भएकाले कम्तीमा १०० टेन्ट राखेर कोरोना परीक्षणपछि मात्रै घर पठाउने तयारी सरकारको छ ।’

तत्काल थोरै संख्यामा आए छिन्चुस्थित स्कूलको भवनमा राखेर परीक्षण गरिने मन्त्री भण्डारीले बताए । ‘बबईमा जग्गा नभेटिएपछि छिन्चु्मा राख्ने गरी खाली जग्गा र विद्यालयको भवन हेरेर फर्किएका छौं,’ भण्डारीले भने, ‘१–२ दिन टेन्ट व्यवस्थापन गर्न लाग्नेछ, त्योभन्दा अघि स्कूलमा राखेर कोरोना भए/नभएबारे परीक्षणको काम शुरू गरिने छ ।’