रुपन्देहीको तिलोत्तमास्थित क्रिमसन अस्पतालमा कोरोना भाइरस संक्रमण पुष्टि भएका गुल्मीका पुरुषको अवस्था सोमवारदेखि स्थिर छ ।

उनी सिकिस्त बिरामी भएर अवस्था चिन्ताजनक रहेको अस्पतालले जनाएको छ ।

गुल्मीको मदाने गाउँपालिका–६ का ती संक्रमित उपचारको क्रममा वैशाख १ गते अर्घाखाँचीको छायाँ पोलिक्लिनिक हुँदै क्रिमसन अस्पतालमा आएका थिए ।

स्वास्थ्य अवस्था गम्भीर भएपछि भेन्टिलेटरमा राखेर उपचार भइरहेको छ । उनी गाउँकै एक विद्यालयका शिक्षक हुन् । 

प्रदेश स्वास्थ्य निर्देशनालयका प्रवक्ता रोशनलाल चौधरीले बिरामीको अवस्था स्थिर रहेको जानकारी दिए । ‘अवस्था गम्भीर छ, के हुन्छ भन्न सक्ने अवस्था छैन । उहाँलाई मस्तिक ज्वरो भनेर अस्पतालमा भर्ना गरिएको रहेछ । पीसीआर जाँच गर्दा कोरोना देखियो । कोरोना अस्पतालमा सारेपनि भेन्टिलेटरमा राख्नुपर्छ । त्यहाँ पनि अहिले भेन्टिलेटरमा हुनुहुन्छ । अस्पतालमै उपचार भइरहेको छ,’ प्रवक्ता चौधरीले भने ।

ज्वरो बढेको र श्वासप्रश्वासमा समस्या देखिएपछि शंका लागेर भैरहवास्थित प्रदेश जनस्वास्थ्य प्रयोगशालामा जाँच गर्दा ४१ वर्षीय ती पुरुषमा कोरोना पोजेटिभ देखिएको छ ।

अस्पतालका जनसम्पर्क अधिकृत चन्द्रकान्त बस्यालले संक्रमित बिरामी उपचार भइरहेको बताए । ‘बिरामी अस्पतालमा चिकित्सकको निगरानीमा हुनुहन्छ । बिरामीको मृत्यु भयो भनेर नचाहिने हल्ला फैलाइयो । बरु अस्पतालभित्र रहेका चिकित्सक, नर्स, बिरामी र बिरामीका आफन्त गरी ३०० जना भित्रै थुनिएकाहरूलाई कसरी व्यवस्थापन गर्ने सरकारले छिटो योजना बनाउनुपर्छ,’ उनले भने ।

सुविधासम्पन्न अस्पतालमा कोरोना संक्रमित बिरामी भेटिएकाले क्रिमसनलाई कोरोना विशेष अस्पताल बनाउनुपर्ने दबाब छ । तिलोत्तमा नगरपालिकाका प्रमुख बाशुदेव घिमिरेले अस्पतालभित्र रहेका चिकित्सक, स्वास्थ्यकर्मीको छिटो पीसीआर जाँचको पहल थाल्नुपर्ने बताए । उनले अस्पताललाई कोरोना अस्पतालको रुपमा रुपान्तरण गर्दा पनि हुने बताए । अस्पताल सोमवारदेखि सील गरिएको छ ।

ती संक्रमित शिक्षक लकडाउन हुनुपूर्वदेखि नै जिल्लामा थिए । उनको परिवारलाई गाउँपालिकाले होम क्वारेन्टाइनमा राखेको छ । उनलाई कसरी कोरोना देखियो अहिले यात्रा विवरण खोजी गर्दा पनि संक्रमण कहाँ भयो भन्ने पत्ता लाग्न सकेको छैन ।

उनी उपचारका लागि पुगेको अर्घाखाँचीको छायाँ पोलिक्लिनिक पनि सील गरिएको छ ।