एक हप्ताभित्रै सञ्चालनमा आउँदै धनगढीको कोरोना विशेष अस्पताल

लखन चाैधरी
लखन चाैधरी

लखन चौधरी लोकान्तरका लागि सुदूरपश्चिम प्रदेश प्रतिनिधि हुन् । 

भौतिक संरचना निर्माण सम्पन्न भैसकेको धनगढीस्थित कोरोना विशेष अस्पताल १ हप्ताभित्रै सञ्चालनमा ल्याउने तयारी थालिएको छ ।

कोभिड–१९ को उच्च जोखिममा परेयता निर्माण थालिएको सो अस्पताल अबको १ हप्ताभित्रै सञ्चालनको तयारी थालिएको हो ।


Advertisement

सुदूरपश्चिम प्रदेशको सामाजिक विकास मन्त्रालयका स्वास्थ्य महाशाखा प्रमुख नरेन्द्र कार्कीले केही दिनभित्रै निर्माण पक्षले भवन हस्तान्तरण गरे लगत्तै सञ्चालनमा ल्याइने जानकारी दिए ।

महाशाखा प्रमुख कार्कीले भने–‘भवन हस्तान्तरण संगै बिजुली, खानेपानी, अक्सिजन जडान गर्न बाँकी छ । तर ६२ वटा बेदहरु तयारी अवस्थामा छन् । अबको एकहप्ताभित्रै सञ्चालन गर्ने योजनामा छौ ।’


Advertisement

रोगको संक्रमण बढ्दै गएको बेला सुदूरपश्चिम प्रदेशको अस्थायी राजधानी धनगढीमा कोरोना विशेष अस्पताल निर्माण थालिएको हो । सुदूरपश्चिम प्रदेश सरकारको लगानीमा १ महिनामै ५० शैयाको कोरोना विशेष अस्पताल तयार पारिएको हो । जिल्ला समन्वय समिति कैलालीको जग्गामा अस्पताल निर्माण गरिएको छ ।

वैशाख १ गतेदेखि निर्माणको काम सुरु गरिएको अस्पतालको भौतिक संरचना वैशाख ३१ गते नै पूरा भएको जनाइएको छ । निर्माण गरिएको अस्पताल सेती प्रादेशिक अस्पतालको मातहतमा रहने भएको छ । अस्पतालको सञ्चालन नै सेती प्रादेशिक अस्पतालमार्फत हुने महाशाखा प्रमुख कार्कीको भनाइ छ ।

प्रदेश सरकारले धनगढीमा कोरोना विशेष अस्पताल निर्माणका लागि १ करोड रुपियाँ बजेट विनियोजन गरेको थियो । ठेकेदार रोहित रानाको किनारा कन्स्ट्रक्सन प्रालिले ९४ लाख रुपियाँमा ठेक्का प्राप्त गरेर अस्पताल निर्माणको काम गरेको सामाजिक विकास मन्त्रालयले जानकारी दिएको छ ।

‘प्रदेश सरकारले यो अस्पताल निर्माणका लागि एक करोड रुपियाँ बजेट छुट्टयाएको थियो’, महाशाखा प्रमुख कार्कीले भने, ‘तर, ९४ लाख रुपियाँको ठेक्का स्वीकृत भइ अस्पताल निर्माण भएको छ ।’

नेपालमै भएको निर्माण सामग्री प्रयोग गरेर कोरोना विशेष अस्पताल तयार पारिएको जनाइएको छ । ‘प्रि–फ्याब हाउस’ तयार पारिएकाले समयमै निर्माण कार्य सम्पन्न भएको जिल्ला स्वास्थ्य कार्यालय कैलालीका प्रमुख लालबहादुर धामीले बताए । 

यो संगै कञ्चनपुरको भीमदत्त नगरपालिकामा पनि ५० शैयाकै कोरोना विशेष अस्तालको निर्माण थालिएको छ । प्रदेश सरकारकै १ करोड बजेटमा निर्माण हुने सो अस्पतालको निर्माण कार्य भने निकै सुस्त रहेको पाइएको छ । स्वास्थ्य महाशाखा प्रमुख कार्कीले हालसम्म ४० प्रतिशत निर्माणको कार्य मात्रै भएको जानकारी दिए ।

मुलुकको अन्य प्रदेशमा जस्तै सुदूरपश्चिम प्रदेश पनि कोरोनाको जोखिम क्षेत्रमा पर्दछ । कैलालीको ४ र कञ्चनपुरको १ गरी सुदूरपश्चिम प्रदेशमा ५ जना कोभिड–१९ संक्रमित थिए । तर उनीहरु उपचारपछि निको भएर घर फर्किसकेका छन् ।

लखन चाैधरी
लखन चाैधरी

लेखकबाट थप...

कमेन्ट गर्नुहोस्