पोखरामा अर्को एक जना युवककाे शव गाडिएकाे अवस्थामा प्रहरीले शव फेला पारेको छ। केही दिनअघि मात्र पोखरा–१४ मा समेत एक युवकको शव गाडिएको अवस्थामा बाहिर निकालेको थियो।

जिल्ला प्रहरी कार्यालय कास्कीका अनुसार मंगलबार साँझ ५ बजेतिर पोखरा–२७, अर्घौमा एक युवकको शव प्रहरीले गाडिएको अवस्थामा बाहिर निकालेको हो। अन्दाजी २२-२३ वर्षका देखिने ती युवक हाल पोखराको सुन्दरीबजारमा बस्ने गरेको जिल्ला प्रहरी कार्यालय कास्कीका प्रवक्ता प्रहरी निरीक्षक नरहरि अधिकारीले जानकारी दिए।

यद्यपि, हाल अनुसन्धानमा रहेकोले उनको नामथर भने प्रहरीले सार्वजनिक गर्न चाहेन । ती युवकको हत्या के कति कारणले भयो भन्नेबारे अनुसन्धान सुरु भएको छ । 

शव निकाल्न जिल्ला प्रहरी कार्यालय सहित डाँडाकोनाक प्रहरी चौकीबाट समेत प्रहरी टोली खटिएको थियो । शव पोष्टमार्टमका लागि पोखरा स्वास्थ्य विज्ञान प्रतिष्ठान (पश्चिमाञ्चल क्षेत्रीय अस्पताल), पोखरामा लगिएको छ । 

जेठ ३ मा पोखरा १४ निवासी २२ वर्षीय विमल रानाभाटको शव प्रहरीले भेटाएको थियो । आफ्नै साथी ज्ञानबहादुर परियारले घनले हानेर रानाभाटको हत्या गरेको प्रहरी अनुसन्धानमा खुलेको छ । परियारले १ महिनाअघि रानाभाटलाई घनले हानेर हत्या गरी उनकै घर पछाडि बारीको डिलमा शव गाडेका थिए।