संक्रमण तीब्र भएसँगै झस्कियो प्रदेश सरकार, तत्काल ४ वटा शव वाहन किन्दै

प्रकाश आचार्य
प्रकाश आचार्य

प्रकाश आचार्य लोकान्तरका लागि ५ नम्बर प्रदेशका प्रतिनिधि हुन् ।

५ नम्बर प्रदेशमा कोरोना भाइरस संक्रमण देखिएको १८ दिनमै १७६ जनामा संक्रमण पुष्टि भयो । बाँकेको नरैनापुर गाउँपालिकाको क्वारेन्टाइनमा रहेको अवस्थामा कोरोनाबाट २५ वर्षीय युवाको मृत्यु भयो ।

सबैभन्दापछि कोरोनाका बिरामी भेटिएको प्रदेशमा संक्रमितको मृत्यु हुन थालेपछि प्रदेश सरकार झस्किएको छ । प्रदेशमा कोरोनाको उपचार गर्ने ४ वटा अस्पतालले मृत्यु हुने संक्रमितको संख्या बढ्दै गए शव व्यवस्थापन जटिल हुने भन्दै शववाहन माग गरेका छन् । अस्पतालको माग बमोजिम प्रदेश सरकारले ४ वटा ‘शव वाहन’ गाडी खरिद गर्दैछ ।


Advertisement

प्रदेश ५ सरकारका सामाजिक विकास मन्त्री सुदर्शन बरालले ४ वटा शव वाहन गाडी खरिदको प्रक्रिया थालिएको बताए । ‘हामीले पहिलो चरणमा ४ वटा अस्पतालको लागि शव वाहन गाडी खरिद गर्दैछौं,’ मन्त्री बरालले लोकान्तरसँग भने, ‘मन्त्रालयले बजेट विनियोजन समेत गरेको छ । शव वाहन गाडी खरिद गर्न आर्थिक मामिला तथा योजना मन्त्रालयसँग अहिले थप बजेट माग्नु परेन ।’ 

प्रदेशमा बुटवल धागो कारखानास्थित कोरोना विशेष अस्पताल, भैरहवाको भीम अस्पताल, दाङको बेलझुण्डीस्थित कोरोना अस्पताल र बाँकेको खजुरास्थित सुशील कोइराला प्रखर क्यान्सर अस्पताललाई कोरोना विशेष अस्पतालको रुपमा स्तरोन्नति गरिएको छ ।


Advertisement

सामाजिक विकास मन्त्रालयका सचिव गोपीकृष्ण खनालले शव बाहक १ हप्ताभित्र खरिद भइसक्ने बताए । ‘गाडीका लागि रकम निकासा भइसकेको छ । एउटा गाडी १५ देखि २० लाख रुपैयाँसम्ममा खरिद हुन्छ,’ सचिव खनालले भने । 

हालसम्म शवको व्यवस्था नगरपालिका गर्ने गरेका छन् । कोरोनाबाट मृत्यु भएकालाई बोक्न अलग्गै ‘डेडिकेटेड’ शव वाहन चाहिन्छ । शव व्यवस्थापनको छुट्टै कार्यविधि छ । बिरामीको निधन भयो भने शवलाई स्वास्थ्यकर्मीले सुरक्षित रुपमा प्लास्टिकले र्‍यापिङ गर्नेछन् । शवलाई दाहसंस्कार गर्ने ठाउँमा लगिने छ । परिवारले अन्तिममा शव हेर्न चाहेमा २ मिटर परबाट शव हेर्न पाउनेछन् र शव सुरक्षाकर्मीले दाहसंस्कार गर्नेछन् ।

बुटवलको कोरोना विशेष अस्पतालका फोकल पर्सन डा. सुदर्शन थापाले वैज्ञानिक र सुरक्षित ढंगले शव व्यवस्थापन गर्नुपर्ने हुँदा शव वाहन गाडी आवश्यक देखिएर खरिदको माग गरिएको बताए । प्रदेशमा हालसम्म कुनै पनि सरकारी निकायले शव वाहन गाडी खरिद गरेका छैनन् । ‘कोरोनाबाट मृत्यु भएकाको शव अन्य शवजस्तो होइन । बडो सतर्कतापूर्वक व्यवस्था गर्नुपर्छ । अन्य सामान्य गाडीमा शव बोक्दा भाइरस सर्ने जोखिम हुन्छ । शव वाहन भए धेरै सहज हुन्छ,’ उनले भने, ‘शव वाहन ‘डिस इन्फेक्सन’ गरेर लैजानुपर्छ । चालकले पीपीई लगाउनुपर्छ ।’

कपिलवस्तुका प्रमुख जिल्ला अधिकारी दीर्घनारायण पौडेलले संक्रमण बढ्दै जाँदा पछि मृत्यु हुने क्रम पनि बढेमा शव व्यवस्थापनमा ठूलो संकट आउन सक्ने बताए । 

प्रदेशका १२ जिल्लामध्ये ७ जिल्लामा कोरोना संक्रमण देखिएको छ । रुपन्देही, बाँके र कपिलवस्तुमा संक्रमित धेरै छन् ।

प्रकाश आचार्य
प्रकाश आचार्य

लेखकबाट थप...

कमेन्ट गर्नुहोस्