यसअघि सुदूरपश्चिमका ५ जना कोरोना संक्रमित वैशाख २६ गते अघि निको भई घर फर्केपछि निकै खुकुलो पारिएको लकडाउन पुनः कडा पारिने भएको छ ।

परीक्षणको दायरा फराकिलो पारेसँगै पुनः एकै दिन ५ जनामा शुक्रवार कोरोना संक्रमण पुष्टि भएपछि सुदूरपश्चिममा सतर्कता अपनाउन थालिएको हो । लकडाउनलाई थप कडा पारिने जिल्ला प्रशासन कार्यालयले जनाएको छ ।

यसैबीच पुन संक्रमण देखिएपछि धनगढी उपमहानगरपालिका एकाएक अत्तालिएको छ । राहतमा कुहिएको चामल प्रकरणमा अल्झिएको उपमहानगरपालिका संक्रमण पुष्टि देखिएसँगै शुक्रवार नगरबासीको नाममा प्रेस नोट जारी गरेको हो ।

जारी प्रेस नोटमा उल्लेख छ – ‘लकडाउनको पूर्ण पालना गर्न आमनगरवासीमा अनुरोध गर्दछौं । जोखिमसँग जुध्न हामी श्रोत साधनले भ्याएसम्म सतर्कता, पूर्वतयारी, चेकजाँचमा जुटेको व्यहोरा नगरवासीमा सादर निवेदन गर्दछौं ।’

त्यस्तै भारत र तेश्रो मुलुकहरुबाट फर्किएका आफन्तबाट अलग्गै रहन समेत उपमहानगरपालिकाले सुझाएको छ । अगाडी भनिएको छ – ‘भारत र तेश्रो मुलुकहरुबाट फर्किएका आफ्नो परिवारको सदस्य भएपनि २१ दिनसम्म घरमा छुट्टै राख्न, रुमाल, लत्ताकपडा लगायतका वस्तुहरुबाट सजिलै भाइरस सर्न सक्ने भएकाले एक अर्कोलाई प्रयोग गर्न नदिन अनुरोध गर्दछौं ।’