पोखरा विश्वविद्यालयमा उपकुलपति र रजिस्ट्रार नियुक्त गर्न माग

पोखरा विश्वविद्यालय प्रजातन्त्रवादी प्राध्यापक संघले लामो समयदेखि रिक्त उपकुलपति र रजिस्ट्रार यथाशीघ्र नियुक्त गर्न माग गरेको छ ।

संघले विज्ञप्ति जारी गर्दै विश्वविद्यालय लामो समयदेखि नेतृत्वविहीन बनेको भन्दै विश्वविद्यालयमा शैक्षिक एवं प्रशासनिक गतिविधि ठप्प भएकोप्रति गम्भीर ध्यानाकर्षण भएको जनाएको छ ।


Advertisement

संघका अध्यक्ष सञ्जीव थापाद्वारा शनिवार हस्ताक्षरित विज्ञप्तिमा देशकै दोस्रो ठूलो विश्वविद्यालय नेतृत्वविहीन बनिरहँदा झण्डै ३० हजार विद्यार्थीको भविष्य अन्योलमा परेको भनिएको छ ।

कोरोनाको संक्रमणबाट बच्न सरकारले बन्दाबन्दी गरेदेखि नै विश्वविद्यालयका अध्ययन–अध्यापन, अनुसन्धान, परीक्षा सञ्चालन, परीक्षाफल प्रकाशनलगायत अन्य प्रशासनिक कार्य पूर्णरूपमा ठप्प हुन पुगेकोप्रति गम्भीर ध्यानाकर्षण भएको विज्ञप्तिमा जनाइएको छ ।


Advertisement

रिक्त पदमा योग्य र सक्षम व्यक्ति नियुक्ति गर्न समेत माग गर्दै विज्ञप्तिमा पदपूर्ति गर्न विभिन्न बहानामा थप ढिलाइ नगर्न र हजारौं विद्यार्थीको भविष्य अन्योलमा नपार्न आग्रह गरिएको छ । 

विज्ञप्तिमा विश्वव्यापी कोरोना महामारीका बेला कत्ति विचलित नभई सुरक्षाका विधि अपनाउँदै सुरक्षित रहन सम्पूर्ण प्राध्यापक, कर्मचारी र विद्यार्थीलाई आग्रहसमेत गरिएको छ । 

पोखरा विश्वविद्यालयमा विगत ८ महिनादेखि उपकुलपति र रजिस्ट्रार पद रिक्त छन् भने २०७७ वैशाखदेखि परीक्षा नियन्त्रक, विभिन्न संकायका डीन र विभिन्न केन्द्रका कार्यकारी निर्देशकको पद रिक्त भएको छ ।

कमेन्ट गर्नुहोस्