नेपाली सेनाले संगठनभित्र विभिन्न भ्रष्टाचारका घटनामा संलग्न भएको आरोपमा उच्च तहका सैनिक अधिकृत सहितका पदाधिकारीलाई कारवाही र अनुसन्धानको दायरामा ल्याएको छ ।

प्रधानसेनापति पूर्णचन्द्र थापाले संगठनमा  भ्रष्टाचारविरुद्ध शून्य सहनशीलता नीति कार्यान्वयनमा कडाइ गरेपछि उनीहरूलाई अनुसन्धान र कारवाहीको दायरामा तानिएको हो ।

सोही क्रममा समरी जनरल सैनिक अदालतले सैनिक आवासीय महाविद्यालय भक्तपुरमा कार्यरत रहँदा सम्पत्ति, अनुशासन र आचरणसम्बन्धी कसूर गरेको अभियोगमा ३ अधिकृतसहित ५ जनालाई दोषी ठहर्‍याइ कारवाही गरेको छ ।

सैनिक कल्याणकारी कोषको लगानीमा सञ्चालित उक्त महाविद्यालयमा आर्थिक अनियमितता छानविन गर्न सहायक रथीको अध्यक्षतामा गठित कोर्ट अफ इन्क्वायरी बोर्ड गठन भएकामा उसले दिएको प्रतिवेदनको आधारमा समरी जनरल सैनिक अदालतले उनीहरुलाई दोषी ठहर गरेको थियो ।

महाविद्यालयका तत्कालीन सम्पर्क अधिकृत महासेनानी भुपालमान अधिकारीसहित १८ जनाको मुद्दा पुर्पक्ष गर्न उपरथीको अध्यक्षतामा गठित अदालतले शुक्रवार फैसला गरेको हो । अदालतले महासेनानी अधिकारीले गैरकानूनीरूपमा सम्पति उपार्जन गरेको ठहर गर्दै १ करोड ८५ लाख ४० हजार रुपैयाँ असुलउपर गर्ने निर्णय सुनाएको छ ।

प्रमुख सेनानी देवबहादुर क्षेत्रीले पनि आर्थिक अनियमितता गरेको ठहर गर्दै अदालतले २ वर्ष बढुवा रोक्का गरी निजबाट ४ लाख ४० हजार रुपैयाँ असुलउपर गर्ने निर्णय भएको सैनिक जनसम्पर्क तथा सूचना निर्देशनालयले जनाएको छ । अदालतले हुद्दा यज्ञराज पोखरेलाई सेवाबाट बर्खास्त गरी अनियमित भएको ३ लाख ६० हजार रुपैयाँ असुलउपर गर्ने  फैसला गरेको छ ।

हुद्दा गणेशबहादुर अधिकारीले आर्थिक अनियमितता गरेको अभियोगमा दोषी ठहर्‍याइ अदालतले २ वर्ष तलब वृद्धि र ग्रेड रोक्का गरी १० हजार रुपैयाँ असुलउपर गर्ने निर्णय गरेकोे हो । अदालतले सहसेनानी सुरेन्द्रविक्रम भण्डारीलाई आर्थिक कार्यमा कानूनी प्रक्रिया अवलम्वन नगरेको ठहर गर्दै नसिहत दिने निर्णय सुनाएको छ । सैनिक जनसम्पर्क तथा सूचना निर्देशनालयका अनुसार सोही मुद्दामा १३ जनाले अभियोगबाट सफाइ पाएका छन् ।
 
सेनाले  पारदर्शिता र जवाफदेहिता कायम गर्न तथा दण्डहीनता अन्त्यका लागि सेनाले अनुशासन र आचरण विपरीत गर्नेमाथि छानविनको दायरा बढाएको जनाएको छ । यसैबीच भ्रष्टाचार कार्यमा संलग्न भएकै आरोपमा सेनाले सहायकरथी प्रयोगजङ्ग राणालाई पनि अनुसन्धानको दायरामा ल्याएको जानकारी प्राप्त भएको छ ।

यसैबीच सैनिक मुख्यालले बलाधिकृतरथी शरद गिरी, उपरथी झंकर कडायत र आनन्द अधिकारीको अध्यक्षता बेग्लाबेग्लै  कोर्ट अफ इन्क्वायरी बोर्ड गठन गरी विभिन्न घटनामा भ्रष्टाचार र अनियमिततको आरोप लागेकामाथि अनुसन्धान र छानबिन गरिरहेको थाहा भएको छ । संगठनभित्र आर्थिक अनियमितताको अभियोग खेप्नुपर्ने आशंका गरेर केही उच्च सैनिक अधिकृतले राजीनामा दिएर घर बसेपनि उनीहरूलाई अनुसन्धान दायरामा ल्याएर छानबिन भइरहेको जनाइएको छ ।