विश्व स्वास्थ्य संगठनले मलेरियाको औषधि हाइड्रोक्सीक्लोरोक्विनको परीक्षण कोभिड–१९ का रोगीहरूका लागि तत्कालका लागि नगर्ने निर्णय लिएको छ । यो औषधि सुरक्षित नरहेको भन्दै संगठनले यसको परीक्षण अस्थायी रूपमा रोकेको हो । 

एक रिपोर्टमा यो औषधि कोरोना रोगीहरूलाई लाभदायक नभई हानिकारक रहेको उल्लेख गरिएको थियो । 

तर मानिसहरू चीनको दबाबमा परी विश्व स्वास्थ्य संगठनले यो औषधिको परीक्षण रोकेको बताउँदैछन् । 

स्वास्थ्यको क्षेत्रमा संसारभरि भएका अनुसन्धानको निष्कर्ष प्रकाशन गर्ने पत्रिका द ल्यान्सेटले शुक्रवार एक रिपोर्टमा हाइडेक्सीक्लोरोक्विन लिने कोरोना रोगीहरूको संख्या उक्त औषधि नखानेहरूको भन्दा बढी भएको उल्लेख गरेको थियो । 

विश्व स्वास्थ्य संगठनले १७ वटा देशका ३५ सय कोरोना रोगीहरूलाई हाइड्रोक्सीक्लोरोक्विन औषधिको परीक्षणका लागि तयार पारेको थियो । यसलाई सोलिडारिटी ट्रायल नाम दिइएको थियो । यसको उद्देश्य कोरोनाको उपचारका लागि औषधि खोज्नु थियो । परीक्षणमा हाइड्रोक्सीक्लोरोक्विनका साथै तीन अन्य औषधि पनि समावेश गरिएका थिए । तर हाइड्रोक्सीक्लोरोक्विनको परीक्षणमा मात्र रोक लगाइएको छ । 

चीनले कोरोनाको उपचारका लागि खोप पत्ता लगाइसकेकाले विश्व स्वास्थ्य संगठनलाई हाइड्रोक्सीक्लोरोक्विनको परीक्षणमा रोक लगाउन दबाब दिएको आरोप लगाइएको छ । 

संगठन चीनको कठपुतली बनेको भनी अमेरिकाका राष्ट्रपति डोनल्ड ट्रम्पले लगातार आरोप लगाइरहेका छन् । अनि ट्रम्पले हाइड्रोक्लीक्लोरोक्विन बनाउने एक कम्पनीमा लगानी गरेकाले पनि यस औषधिको निकै जोडतोडले प्रवर्द्धन गरिरहेका छन् । आफूले यो औषधि खाइरहेको पनि उनले गत साता बताएका थिए । तर अमेरिकी विशेषज्ञहरूले नै यो औषधि कोरोनाको उपचारमा प्रभावकारी नरहेको बताउँदै आएका छन् । 

ब्राजिलले त विश्व स्वास्थ्य संगठनको अस्थायी रोकका बावजूद हाइड्रोक्सीक्लोरोक्विनको उपचार कोभिड–१९ रोगीहरूमा गरिरहने बताएको छ । 

यसको प्रयोगको समर्थन र विरोधमा भूराजनीतिक द्वन्द्व पनि जोडिएको हो कि भनी विश्लेषणहरू भइरहेका छन् ।