गण्डकी प्रदेश सभाको मंगलवारको बैठकमा विश्वव्यापी महामारीका रूपमा फैलिएको कोरोना भाइरसको बढ्दो संक्रमणलाई लक्षित गरी सरकारले उचित कदम चाल्न माग गरिएको छ ।

प्रदेश सभाको मंगलवारको बैठकको शून्य समयमा बोल्दै सदस्यहरूले सीमा क्षेत्रबाट नेपाली भित्रिने क्रमसँगै कोरोना संक्रमण पनि बढिरहेकाले राखिएका क्वारेन्टाइन व्यवस्थित गर्नुपर्ने र पिसीआरको दायरा बढाउनु पर्ने माग गरे ।

सदस्यहरूले भित्रिएका सर्वसाधारणको उचित व्यवस्थापनतर्फ ध्यान दिनुपर्नेमा जोड दिए । प्रदेशसभा सदस्य इन्द्रलाल सापकोटाले मुलुक कोरोना भाइरसको मारमा परेको बताउँदै भारतबाट आएका सर्वसाधारणको सुरक्षित व्यवस्थापन अहिलेको आवश्यकता भएको बताए । क्वारेन्टाइन व्यवस्थित बन्न नसकेको उल्लेख गर्दै उनले बनाइएका क्वारेन्टाइनमा खानपान, शौचालय लगायतका समस्या रहेको बताए ।

कोरोनाको रोकथाम र नियन्त्रणलाई प्रभावकारी बनाउन स्थानीय तहलाई सहयोग गर्नुपर्ने आवश्यकता औंल्याउँदै उनले कोरोनाका कारण अर्थतन्त्रमा परेको संकटका साथै विकास निर्माण ठप्प भएकोप्रति गम्भीर बन्नुपर्नेमा जोड दिए ।

अर्का सदस्य कृष्णबहादुर थापाले कोरोनाको रोकथाम र नियन्त्रणमा अग्रमोर्चामा खटिएका स्वास्थ्यकर्मी, सुरक्षाकर्मी, सञ्चारकर्मी, निर्माणमा खटिएका मजदुर आदिको परिवारका सदस्यको कम्तीमा एक जनाको पीसीआर परीक्षण गर्नुपर्ने आवश्यकता औंल्याए । स्थापित क्वारेन्टाइनको स्तर मापन गर्नुपर्नेमा उनको जोड छ ।

प्रदेशसभा सदस्य दोवाटे विश्वकर्माले कोरोनाको त्रासबाट नेपाल अछुतो रहन नसकेको उल्लेख गर्दै अस्पतालहरूलाई सुविधासम्पन्न बनाउँदै परीक्षणको दायरा बढाउनुपर्ने बताए ।

प्रदेशसभा सदस्य प्रकाशचन्द्र दवाडीले गोरखाको उत्तरीभेगका जनता भोकभोकै परेको, मल, बीउ नपाएको भन्दै प्रदेश सरकारको ध्यानकर्षण गराए । अर्का सदस्य भगवतप्रकाश मल्लले वालिङको क्वारेन्टाइनमा रहेका व्यक्तिलाई कोरोना संक्रमण देखिएको बताउँदै उनीहरूको प्रभावकारी उपचार हुनुपर्ने बताए । संक्रमितको आवश्यकता अनुसार पश्चिमाञ्चल क्षेत्रीय अस्पतालमा ल्याएर उपचार गर्न उनले माग गरे ।

प्रदेशसभा सदस्य मनकुमारी गुरुङले बन्दाबन्दीका कारण गण्डकी प्रदेशको पर्यटनमा गम्भीर असर पारेको बताए । उनले बन्दाबन्दीका कारण ऋण लिएर व्यवसाय सञ्चालन गरिहेका व्यवसायीलाई यसको प्रभाव रहँदासम्म ब्याज मिनाहा गर्न आग्रह गरे ।

प्रदेशसभा सदस्य मनबहादुर गुरुङले हालैको बाढीका कारण मादी गाउँपालिकामा पारेको प्रभावबारे ध्यानाकर्षण गराए । लक्ष्मी सुनारले दलित समुदायका व्यक्तिले अन्तरजातीय विवाह गर्न खोज्दा चौरजहारीमा भएको घटनाबारे ध्यानाकर्षण गराए । प्रदेशसभा सदस्य विष्णुप्रसाद लामिछानेले हालैको आँधीबेहरीले नवलपुरको गैंडाकोटमा पारेको असरबारे ध्यानाकर्षण गराए ।

प्रदेशसभा सदस्य मणिभद्र शर्माले वाग्लुङको धवलागिरि अञ्चल अस्पतालमा व्यवस्थापन समितिका अध्यक्षले अपाङ्गता कर्मचारीलाई हाजिर हुन नदिएकोप्रति ध्यानाकर्षण गराए ।