पाल्पामा कोरोना परीक्षण गर्ने किट अभाव

पाल्पामा भारत तथा तेस्रो मुलुकबाट आउने नागरिक वृद्धिसँगै कोरोना परीक्षणका लागि आवश्यक किट अभाव देखिएको छ ।

पाल्पा हेल्प डेस्कका संयोजक टुकप्रसाद भट्टराईका अनुसार सीमा क्षेत्रबाट उद्धार गरेर ल्याइएका नागरिकको सोमवारदेखि परीक्षण हुन नसकेको बताए ।


Advertisement

पछिल्लो ३ दिनमा करीब ४५० नागरिक पाल्पा भित्रिएकामा आइतवार आरडीटी र पीसीआरका लागि स्वाब संकलन गरिएको तर सोमवारदेखि जिल्ला स्वास्थ्य कार्यालयले परीक्षणका लागि गम्भीरता नदेखाएको भट्टराईको गुनासो छ । 

‘परीक्षण नगरी स्थानीय तहको जिम्मा लगाउन बाध्य छौं, जिल्लामा भयावह अवस्था आउँछ कि भन्ने चिन्ता छ,’ उनले भने ।


Advertisement

जिल्ला स्वास्थ्य कार्यालयका निमित्त प्रमुख विश्वनाथ भट्टराईले जिल्लामा आएका नागरिकको परीक्षण गर्न किट अभाव रहेको स्वीकारे । उनका अनुसार हालसम्म जिल्लामा आरडीटीका लागि १ हजार र पीसीआरका निम्ति साढे ४०० हाराहारीमा किट रहेकामा अब आकस्मिक जाँचका लागि बाहेक पर्याप्त छैन ।
 
जिल्ला प्रशासन कार्यालयका सूचना अधिकारी यज्ञेश्वर पन्थीका अनुसार गत चैतदेखि अहिलेसम्म जिल्लामा आएका करीब ६०० जनामध्ये ५५१ जनाको आरडीटी तथा ७९ जनाको पीसीआर परीक्षण गरिएको र रिपोर्ट नेगेटिभ आएको छ । अब १७० जनाको पीसीआर रिपोर्ट आउन बाँकी छ । 

रुपन्देहीको बेलहिया, कपिलवस्तुको कृष्णनगर तथा नवलपरासीका विभिन्न नाका हुँदै नेपाल प्रवेश गरेका पाल्पालीको उद्धार गरी जिल्लामा ल्याएर स्वास्थ्य परीक्षण गर्ने व्यवस्था गरिएको छ । पाल्पा आएका नागरिकलाई तानसेनमा स्थापित क्वारेन्टाइनमा राख्ने, आरडीटी र पीसीआर विधिबाट परीक्षण गर्दा रिपोर्ट पोजेटिभ देखिए आइसोलेसनमा पठाउने र नेगेटिभ देखिएकालाई सम्बन्धित स्थानीय तहको जिम्मा लगाउने व्यवस्था गरिएको जिल्ला समन्वय समितिका कार्यवाहक संयोजक मीरा मरासिनीले जानकारी दिए ।

स्थानीय तहमा लगेपछि पुनः १४ दिन क्वारेन्टाइनमा राख्ने तथा आरडीटी गरेर १ हप्ता होम क्वारेन्टाइनमा बस्ने गरी पठाउने गरिएको प्रमुख जिल्ला अधिकारी यादव सुवेदीले बताए ।

यसैबीच कोरोना रोकथाम तथा नियन्त्रण समिति पाल्पाको मंगलवार साँझ बसेको बैठकले प्रदेश र संघीय सरकारसँग किट माग गर्ने निर्णय गरेको छ । 

कमेन्ट गर्नुहोस्