कोरोनाभाइरसविरुद्ध खोपका लागि विभिन्न देशमा अहिले परीक्षण चलिरहेको छ । अमेरिकाको मोडर्ना कम्पनीले पनि एक खोप बनाएर मानिसमा त्यसको परीक्षण गरिरहेको छ । 

तर त्यो परीक्षण खोप लगाउने युवकमा त्यसको नराम्रो असर देखिएको बताइएको छ । 

वाशिङटनमा बस्ने २९ वर्षीय युवक इयन हेडनले कोरोनाको खोप लगाएका थिए । खोप लगाएपछि आफू बेहोश भएको उनले स्वास्थ्यसम्बन्धी खबर दिने वेबसाइट एसटीएटी न्युजलाई बताए । 

खोपको दोस्रो डोज दिएको १२ घन्टापछि आफूलाई १०३ डिग्री ज्वरो आएको उनले बताए । 

उनी बिरामी परेपछि इमर्जेन्सी क्लिनिक लगियो । त्यहाँबाट घर फर्किंदा उनी बेहोश भए । तर २४ घन्टापछि उनको स्वास्थ्यमा सुधार आयो । 

केही मानिसलाई यो सुनेर डर लाग्ने तर मानिसहरूले खोपको विरोध नगर्ने आश गरेको इयनले बताए । 

अमेरिकामा रोयटर्सले गरेको एक सर्वेक्षण्मा लगभग २५ प्रतिशत युवाले खोप लगाउन रुचि नदेखाएको पाइयो । उनीहरूले खोपको सुरक्षाका विषयमा चिन्ता व्यक्त गरेका थिए ।

इयन हेडनले मोडर्ना भ्याक्सिनको पहिलो डोज लगाउँदा हात दुखेको र हातलाई काँधमाथि उठाउन पनि गाह्रो परेको बताए । 

दोस्रो डोज दिँदा चाहिँ उनलाई ज्वरै फुट्यो । बिहान ५ बजे उनलाई इमर्जेन्सी क्लिनिक लगियो र चिकित्सकले उनलाई अस्पताल जान भने । तर उनी घर गए अनि घरमा उनलाई बान्ता आयो र उनी बेहोश भए । 

मोडर्ना कम्पनीले इयन लगायत ४५ स्वयंसेवीलाई कोरोनाको परीक्षण खोप लगाएको छ । चार स्वयंसेवीलाई यसबाट गम्भीर समस्या आएको छ तर कसैको ज्यान पनि खतरामा छैन । 

तर खोपले नराम्रो असर परेका अन्य व्यक्तिको बढी जानकारी उपलब्ध छैन । मोडर्नाका अनुसार, इयनसँगै तीन अन्य व्यक्तिलाई खोपको उच्च डोज दिइएको थियो । 

इयनले बिरामी भए पनि खोप लगाएर आफूलाई कुनै पश्चात्ता नभएको बताए । यसले शरीरमा खराब असर गर्ला भन्ने पीर पनि उनलाई छैन । 

खोप सुरक्षित रहेको जस्तो लागेको र यसले भाइरसविरुद्ध इम्युन रेस्पोन्स उत्पन्न गराइरहेको मोडर्ना कम्पनीको भनाइ छ ।