बाँदरले हैरान पारेपछि अदुवा खेतीतिर किसान

प्रतिकात्मक तस्वीर

यहाँको एक सहकारीले सामूहिकरूपमा अदुवाखेती शुरुआत गरेको  छ ।

स्याङ्जाको गल्याङ नगरपालिका–९ का विभिन्न ठाउँमा तुल्सीभञ्ज्याङ साना किसान कृषि सहकारी संस्थामार्फत सामूहिक रूपमा सो खेती  लगाइएको हो । 


Advertisement

वडा नं ९ का उमाकोट, गेझा, गौमुख, जामुने र बेल्चौरमा झण्डै ६०० रोपनी जग्गा भाडामा लिएर व्यावसायिकरूपमा अदुवा लगाइएको संस्थाका अध्यक्ष दलबहादुर सिंजालीले जानकारी दिए ।

'उत्पादनका दृष्टिले सम्भावना भएको ठाउँ हुँदाहुँदै पनि बाँदरको समस्याका कारण बालीनाली उत्पादन गर्न असहज भइरहेका बेला सहकारीमार्फत सामूहिक अदुवाखेती गरेका हौं', उनले भने, 'सहकारीमार्फत सामूहिकरूपमा खेती गर्दा काम गर्न सहज, अनुभव आदानप्रदान हुने, कामदार तथा मजदुरको समस्या नहुने र ठूलो परिमाणमा उत्पादन गर्दा बजारीकरणमा पनि सहजता हुनेछ ।'


Advertisement

गत चैतबाट दुई महिनाको अवधिमा झण्डै ६५ मेट्रिक टन अदुवा लगाएसँगै पहिलो चरणको काम सकिएको उनले बताए ।

'प्रतिरोपनी एक हजारका दरले स्थानीयवासीको जग्गा १ देखि ५ वर्षसम्मको अवधि राखेर जग्गा सम्झौता गरियो', उनले भने, 'सहकारीले आफ्नै लगानीमा ‘एक सहकारी एक उत्पादन कार्यक्रम’अन्तर्गत व्यावसायिक अदुवाखेती गरेका हौं ।'

सहकारीले इलाम र सिन्धुलीबाट प्रतिकेजी १३०का दरले ६५ मेट्रिक टन अदुवा ल्याएर लगाएको संस्थाका प्रबन्धक शम्भु अधिकारीले जानकारी दिए ।

सहकारीले अदुवासँगै मिश्रित बालीका रूपमा रामतोरियालगायतका तरकारीखेती पनि गरेको छ ।

'खेतीका लागि निकै सम्भावना बोकेका जग्गा बाँझो देखेपछि स्थानीयवासीसँग समन्वय गरी व्यावसायिक अदुवाखेतीका लागि जग्गा लिजमा लियौं', उनले भने, 'यही अभियानको प्रभावस्वरूप यहाँका अन्य जग्गामा पनि खनजोत गरी केही न केही लगाउने कार्यले तीव्रता पाएको छ यो खुशीको कुरा हो ।'

एक वर्षीय नगदे तथा मसला बालीका रूपमा रहेको अदुवामा मानिसलाई चाहिने कार्बोहाइड्रेट, प्रोटिन, चिल्लो पदार्थ, भिटामिन, खनिज पदार्थ, पानीका साथै रेसा तथा अन्य औषधियुक्त तत्वसमेत प्रशस्त मात्रामा पाइन्छ ।

अदुवा एक प्रमुख मसलाबाली तथा नगदेबाली भएकाले पनि यसलाई कृषकले आफू खानलाई भन्दा पनि बिक्री वितरण गरी आय आर्जनलाई मध्यनजर गरी खेती गर्ने प्रचलन छ । 

कमेन्ट गर्नुहोस्