अमेरिकाका राष्ट्रपति डोनल्ड ट्रम्पले सामाजिक सञ्जाल कम्पनीहरूलाई लक्षित गरी बनाइएको कार्यकारी आदेशमा बिहीवार हस्ताक्षर गरेका छन् । ट्विटरले उनका दुई ट्वीटलाई दिग्भ्रमित गराउनसक्ने भनी लेबल लगाइदिएपछि क्रुद्ध बनेका ट्रम्पले कार्यकारी आदेश ल्याएका हुन् । 

आदेशमा हस्ताक्षर गर्नुअघि ओभल अफिसमा बोल्दै ट्रम्पले अमेरिकी इतिहासमै अभिव्यक्ति स्वतन्त्रताले गम्भीर खतरा बेहोरेको भन्दै त्यसको प्रतिरक्षा गर्नलाई यो कदम चालिएको बताए । 

‘मुट्ठीभरका सामाजिक सञ्जाल एकाधिकारवादीहरूले अमेरिकामा सबै सार्वजनिक र निजी सञ्चारमा नियन्त्रण राख्ने गरेका छन् । उनीहरूसँग निजी नागरिक र विशाल सार्वजनिक प्रेक्षकहरूबीचको संवादलाई सेन्सर गर्ने, रोक्ने, सम्पादन गर्ने, लुकाउने, परिवर्तन गर्ने अनियन्त्रित शक्ति छ,’ ट्रम्पले भने । 

यो कार्यकारी आदेशले ह्वाइट हाउसको अधिकारक्षेत्रको परीक्षण गर्नेछ । यसले सन् १९९६ को कानूनको पुनर्व्याख्या गर्दै विशाल सामाजिक सञ्जाल प्लेटफर्महरूको शक्ति खुम्च्याउने प्रयास गरेको छ । 

कानूनविद्हरूले भने यस प्रस्तावका विषयमा गम्भीर चिन्ता प्रकट गरेका छन् । यसले पहिलो संशोधनले दिएको अधिकार हनन गर्ने खतरा रहेको र यसले सरकारका दुई अन्य अंगलाई किनारा पार्ने कोशिश गरेको उनीहरूको भनाइ छ । 

सामाजिक सञ्जालमा गलत सूचना प्रवाहको समस्या चर्किंंदै गएपछि कम्पनीहरू समस्यामा परिरहेको बेलामा ट्रम्पले उनीहरूविरुद्ध युद्ध शुरू गरेका छन् । यी साइटहरूले कन्जर्भेटिभहरूको आवाज दबाउने गरेको आरोप ट्रम्पले लगाउने गरेका छन् । 

बिहीवार ट्रम्पले कार्यकारी आदेशमा कानूनी चुनौती रहेको स्वीकार गरे र उनीहरूले मुद्दा हाल्ने विषयमा आफू ढुक्क रहेको बताए ।

सीएनएनबाट