भारतबाट फर्केर क्वारेन्टाइनमा बसेकाहरुले राेपे बाेटबिरुवा

सरकारले काेराेना भाइरस राेकथामका लागि चैत ११ गतेदेखि लागू गरेकाे लकडाउन जेठ मसान्तसम्मका लागि लम्ब्याएकाे छ। अन्तर्राष्ट्रिय सीमानाकाबाट आवागमन पनि असार १६ गतेसम्मका लागि राेक्ने निर्णय पनि शनिबार नै भएकाे छ।

काेराेनाले विश्वव्यापी महामारीकाे रुप लिँदा राेजगारीकाे सिलसिलामा भारतमा गएका नेपालीहरु बेराेजगार बनेपछि स्वदेश फर्कने क्रम बढेकाे छ। यसरी भारतबाट फर्केकाहरुलाई स्थानीय तहले बनाएकाे क्वारेन्टाइनमा राख्ने गरिएकाे छ ताकि काेराेना संक्रमण रहेछ भने पनि घरपरिवार र समाजमा नफैलियाेस्। 


Advertisement

यसरी भारतबाट फर्केर कैलालीकाे भजनीस्थित क्वारेन्टाइनमा रहेकाहरु भने रचनात्मक काम गर्न थालेका छन्।

भजनी नगरपालिका ३ कुसुमघाटस्थित दुर्गा माध्यमिक विद्यालयमा बनाइएकाे क्वारेन्टाइनमा रहेकाहरु बाेटबिरुवा राेप्नुका साथै सरसफाइ गर्न थालेका छन्।


Advertisement

भजनी ३ का अध्यक्ष विक्रम चाैधरीका अनुसार भारतकाे गुजरात र राजकाेटबाट फर्केका ३७ जना उक्त क्ववारेन्टाइनमा छन्। क्वारेन्टाइनमा रहेका अर्जुन कुमाल  दिन कटाउन गाह्राे भएपछि साथीहरुकाे सरसल्लाहमा स्कूल हातामा बाेटबिरुवा राेप्नुका साथै सरसफाइ गरिएकाे बताउँछन्।

क्वारेन्टाइनमा रहेका अर्का युवा केशर कडायत पनि समाजलाई सकारात्मक सन्देश जाओस् भनेर बाेटबिरुवा राेपिएकाे बताउँछन्।

वडाध्यक्ष चाैधरीका अनुसार उनीहरुलाई बस्न र खानाकाे व्यवस्था स्थानीय सरकारले गरेकाे छ।

 

लोकान्तर संवाददाता
लोकान्तर संवाददाता

लेखकबाट थप...

कमेन्ट गर्नुहोस्