नेपालले जारी गरेको नयाँ नक्सालाई संविधान संशोधनमार्फत संविधानमा राख्नका लागि प्रस्ताव पेश गर्ने बाटो खुलेपछि यसबाट भारतसँगको सम्बन्ध बिग्रने व्याख्या भारतीय पत्रिका नवभारत टाइम्सले गरेको छ । 

नेपाल सरकारले देशको नयाँ राजनीतिक तथा प्रशासनिक नक्सामा कालापानी, लिपुलेक र लिम्पियाधुरालाई समावेश गरेको छ । प्रमुख प्रतिपक्षी दल नेपाली कांग्रेसले यसका लागि आवश्यक संविधान संशोधन विधेयकलाई समर्थन गर्ने निर्णय लिएको छ । यो अब दुईतिहाइ बहुमतले पारित हुने अपेक्षा छ । 

इन्द्राणी बागचीको बाइलाइनमा आएको समाचारमा उल्लेख गरिएको छ : 

यस विधेयकलाई नेपालको संसद्ले पारित गरेमा राष्ट्रवादी नेताका रूपमा ओलीको छवि बलियो हुन्छ र भारतविरोधी दृष्टिकोणका कारण उनी आफ्नै दलभित्र पनि विरोधीहरूमाथि हावी हुन्छन् ।

भारतीय अधिकारीहरूका अनुसार, नेपाली कांग्रेसले यस विषयमा चर्चाका लागि समय मागेको थियो तर त्यस चर्चाको परिणाम पहिलेदेखि नै निश्चित थियो । नेपालमा संविधान संशोधनको पक्षमा पहिले नै जनमत बनिसकेको छ र यसविरुद्ध नेताहरूलाई जान सहज छैन । 

प्रधानमन्त्री नरेन्द्र मोदीको बारम्बार प्रयासका बावजूद नेपालसँगको सम्बन्ध अघि बढाउन भारतका लागि चुनौतीपूर्ण रहेको छ । ओलीको झुकाव चीनतर्फ भएकाले भारत र नेपालबीचको सम्बन्धमा समस्या आएको छ । ओली भारतविरोधी भावनाका लागि प्रख्यात छन् । 

यस विषयमा भारतको दृष्टिकोण पनि कडा बन्दै गएको छ । सूत्रहरूका अनुसार, शायद लिपुलेक सडकको उद्द्घाटन यति भव्य तरिकाले गर्नु हुँदैनथियो । अनि सेनाप्रमुखले नेपाल चीनको इशारामा काम गरिरहेको छ भनी बयान दिँदा पनि आगोमा घिउ हाल्ने काम भयो । उनको बयानले गर्दा नेपाली सेनामा आक्रोश छ । 

तर नक्सा परिवर्तन गर्ने नेपालको कोशिशले दुई देशको सम्बन्ध मुश्किलमा पर्ने देखिन्छ ।