भारतमा जासूसी गर्दागर्दै पक्राउ परेका पाकिस्तानीहरू सामान्य मिसनमा नरहेको खुलेको छ । 

आइतवार दिल्लीमा पक्राउ परेका तीन जासूसले ठूलो रहस्या जान्न प्रयास गरेका हैन रहेछन् । तर उनीहरूले खोजेको जानकारी पाएका भए भारतका लागि अनर्थ हुन पुग्थ्यो । 

उनीहरूले भारतीय सेनाको सप्लाई रूटका बारेमा जान्न खोजेका थिए र त्यो जानकारी पाकिस्तानले पाएको भए भारत कमजोर हुन्थ्यो । 

सूचना पाउनका लागि उनीहरूले अनेकथरी रूप परिवर्तन गरे । कहिले उनीहरू व्यापारी बने, कहिले आफूलाई सुरक्षा कम्पनीको प्रमुख भने अनि कहिले पत्रकारको भेष धरे । 

पाकिस्तानी जासूसी संस्था आईएसआईबाट तालिमप्राप्त दुई जासूस आबिद हुसैन र ताहिरको नजर विभिन्न विभागमा साना रक्षा कर्मचारीहरूमा थियो । उनीहरूसँग सूचना लिनका लागि उनीहरू सम्पर्क गरिरहन्थे । 

उनीहरू रेलवेमार्फत हतियार र सैन्य सामग्री कहाँकहाँ सप्लाई गरिन्छन् भन्ने कुरा जान्न चाहन्थे । त्यो जानकारी पाएपछि उनीहरू ठूलै षड्यन्त्र बनाउने ताकमा थिए । 

यी जासूसहरूले हतियार लैजाने बाटो पत्ता लगाएको भए पाकिस्तानसँगको युद्ध वा संघर्षमा भारतलाई गाह्रो पर्थ्यो । पाकिस्तानले भारतीय सेनाको हतियार र सैन्य सामग्रीको सप्लाई गर्ने रेलवे ट्य्राकलाई ध्वस्त पार्न सक्थ्यो अनि हतियार सीमामा पुग्न ढिलाइ हुँदा पाकिस्तानलाई फाइदा पुग्थ्यो । 

युद्धकालमा सैनिकहरूको मुभमेन्टको जानकारी शत्रुदेशका लागि महत्त्वपूर्ण हुन्छ । सेनाले हतियार लग्न सामान्य रूट उपयोग गर्दैन । जासूसहरूले सैनिक रूट पत्ता लगाएको भए युद्धको स्थितिमा पाकिस्तानलाई निकै फाइदा हुन्थ्यो । जासूसहरू सफल भएका भए पाकिस्तानले भारतीय सेनाको ट्यांक र अन्य हतियारको सप्लाई रोकिदिन्थ्यो र सीमामा कडा आक्रमण गरिदिन्थ्यो । 

आइतवार दिल्लीको करोलबागमा पक्राउ परेका आबिद र ताहिरमध्ये आबिदले आफूलाई पत्रकार भन्दै कर्मचारीसँग भेट्न आएको थियो । पाकिस्तानविरुद्ध भारतको तयारी देखिने रेलवे मुभमेन्टका बारेमा स्टोरी गर्न खोजेको उसले बताएको थियो । उसलाई र ताहिरलाई कागजात साटासाट गर्दै गर्दा पक्राउ गरिएको थियो । 

जासूसहरू पक्राउ परेपछि २४ घन्टाभित्र भारत छोडेर जानुपर्‍यो । विगत एक वर्षमा उनीहरूले तल्लो दर्जाका नौ कर्मचारीसँग जानकारी हात पार्ने कोशिश गरेका थिए । फेब्रुअरी महिनामा उनीहरूले एक जवानसँग मित्रता गाँसेका थिए । तिनै जवानलाई भेट्न आइतवार उनीहरू करोलबाग पुगेका थिए ।