अमेरिकामा काला जातिका पुरुष जर्ज फ्लोयडको मृत्युपछि भड्किएको विरोध प्रदर्शनका क्रममा प्रहरीले क्रूरता देखाएको छ । 

न्युयोर्क प्रहरीले निःशस्त्र एक वृद्ध प्रदर्शनकारीलाई धकेल्दा उनी लडेर टाउको फुटेको छ । वृद्ध तत्कालै बेहोश भएका थिए । 

वृद्ध प्रदर्शनकारीको रगत निस्केको देख्दा पनि प्रहरी उनको सहायताका लागि रोकिएन । 

प्रहरीको यस क्रूरताको भिडियो सामाजिक सञ्जालमा भाइरल बनिरहेको छ । घटनापछि आरोपित दुई प्रहरी अधिकारीलाई निलम्बन गरिएको छ र घटनाको अनुसन्धान गर्न आदेश दिइएको छ । 

घाइते वृद्धलाई अस्पताल भर्ना गरिएको छ । उनको स्वास्थ्य स्थिर छ । 

जर्ज फ्लोयडलाई प्रहरीले नियन्त्रणमा लिएर घाँटी थिचेर सास फेर्न नदिई मारेको घटनाको विरोधमा अमेरिकामा निरन्तर विरोध प्रदर्शन भइरहेका छन् । शुरूमा हिंस्रक बनेको प्रदर्शन अहिले शान्तिपूर्ण बन्दै गएको छ । 

तर बिहीवार वाशिङटन डीसीस्थित लिंकन मेमोरियल बाहिर प्रदर्शन गरिरहेका मानिसले प्रहरीमाथि खाली बोतल प्रहार गरेका छन् । 

हिंसात्मक आन्दोलनमा १२ भन्दा बढीले ज्यान गुमाइसकेका छन् । 

प्रदर्शनकारीमाथि प्रहरीले रबर र प्लास्टिकको गोली प्रहार गरिरहेको छ । अनि भीडमाथि फ्ल्याशब्यांग्स ग्रिनेड पनि प्रहरीले प्रहार गरिरहेको छ । त्यो विस्फोट हुँदा प्रकाश र चर्को आवाज निस्कन्छ । प्रहरीले खुर्सानीको स्प्रे पनि प्रदर्शनकारीमाथि प्रहार गरिरहेको छ । त्यसले मानिसको आँखा पोल्छ । 
 

भिडियो हेर्न यहाँ क्लिक गर्नुहोला ।