निर्णय नहुँदै लकडाउन खुकुलो, काठमाडौं छिर्ने नाकामा सवारी जाम

गगन अर्याल
गगन अर्याल

लोकान्तर संवाददाता अर्याल सुरक्षा/अपराध तथा समसामयिक विषयमा समेत कलम चलाउँछन् ।

कोरोना भाइरस (कोभिड–१९) संक्रमणको महामारीका कारण देशमा बन्दाबन्दी (लकडाउन) भएको सोमवार ७७ औं दिन चलिरहेको छ । यसबीच कोभिड–१९ क्राइसिस म्यानेजमेन्ट सेन्टर (सीसीएमसी) ले लकडाउन खुकुलो पार्ने मोडालिटी बनाइरहेको चर्चा समेत छ ।

लकडाउन खुकुलो भएको निर्णय नहुँदै आम सर्वसाधारणको गतिविधि र आवतजावत बढेको छ । राजधानी काठमाडौं उपत्यकाभित्र पसलहरू बिस्तारै खुलिरहेका छन् भने सडकमा यातायातका साधन पनि बाक्लिन थालेका छन् ।


Advertisement

काठमाडौं प्रवेश गर्ने विभिन्न नाकामा गाडीको चाप समेत बढेको छ । नागढुंगा नाकामा ड्युटीमा खटिएका सशस्त्र प्रहरी बलका प्रहरी नायब निरीक्षक (सई) विमल सिलवालले अन्य समयभन्दा उपत्यका भित्रिने सवारीसाधन बढेको बताए । ‘लकडाउन खुकुलो हुँदैछ भन्ने सुनेर होला मानिसहरू उपत्यका आइरहेका छन्,’ सई सिलवालले लोकान्तरसँग भने ।

त्रिभुवन अन्तर्राष्ट्रिय विमानस्थलमा अन्तर्राष्ट्रिय चार्टर्ड उडानहरू बढिरहेका छन् । आइतवार जापानको लागि चार्टर्ड उडानहरू भएकाले पनि नाकाबाट भित्रिनेको संख्या बढेको सई सिलवालले बताए । प्रहरीले जापान लगायत विदेश जान काठमाडौं आएका व्यक्तिको विवरण लिएर, हवाइ टिकट लगायत सम्बन्धित जिल्लाबाट पठाइएको पासको फोटो खिचेर प्रवेश दिने गरेको छ ।


Advertisement

नागढुंगाबाट एम्बुलेन्स, प्रहरी, सेना, सशस्त्र प्रहरी, स्वास्थ्यकर्मी, अत्यावश्यक सामानका गाडी, पास भएका सवारीसाधन बाहेक अन्यलाई उपत्यकाभित्र छिर्न नदिने गरी कडाइ गरिएको महानगरीय प्रहरी वृतका वृतपति प्रहरी नायब उपरीक्षक (डीएसपी) घनश्याम श्रेष्ठले बताए । डीएसपी श्रेष्ठले लोकान्तरसँग भने, ‘सरकारले तोकेकाभन्दा अन्य व्यक्तिलाई हामीले नाकाबाटै फर्काइदिने गरेका छौं ।’

पूर्वबाट काठमाडौं उपत्यका भित्रिने साँगा नाकामा पनि उपत्यका छिर्ने सवारीसाधनको लाइन नै लाग्ने गरेको छ । प्रहरीले नाकामा रोकेर सवारीसाधनको पास जाँच गर्ने गरेको छ । एम्बुलेन्सलाई पनि रोकेर राम्रोसँग चेक गरेर मात्र जान दिइएको छ ।

‘अलिकति खुकुलो भएको हल्लाले अत्याधिक सवारीसाधन उपत्यका छिर्न खोजिरहेका छन् तर हामीले विना पासका सवारीसाधन छिर्न दिएका छैनौं,’ साँगामा खटिएका ट्राफिक प्रहरी हवल्दार श्यामबहादुर कार्कीले भने, ‘कोही वडाध्यक्षको फोन लिएर आउनुहुन्छ त कोही म फलानाको मान्छेको हो भनेर आउनुहुन्छ तर विना पासका कसैलाई पनि जान दिइएको छैन ।’

गगन अर्याल
गगन अर्याल

लेखकबाट थप...

कमेन्ट गर्नुहोस्