परराष्ट्रमन्त्री प्रदीप ज्ञवालीले अबको पुस्ताले कहिल्यै नाकाबन्दी भोग्नु नपर्ने गरेर नेपालले छिमेकी सम्बन्धहरू बिस्तार गरेको बताएका छन् ।

मंगलवार प्रतिनिधि सभामा भएको विनियोजन विधेयकको मन्त्रालयगत छलफलमा बोल्दै ज्ञवालीले नेपाल भू-परिवेष्ठितबाट भू-जडित भएको भन्दै अब नेपालमाथि नाकाबन्दी नलाग्ने बताएका हुन् ।

'मेरो पुस्ताले तीन-तीन पटक नाकाबन्दी भोग्यो,' संसदमा बोल्दै मन्त्री ज्ञवालीले भने, 'अबको पुस्ताले कहिल्यै नाकाबन्दी भोग्नुपर्दैन ।'

उनले पारवाहन सेवालाई विविधिकरण गरिएको, भू-परिवेष्ठित स्थितिलाई भू-जडीत बनाइएको र नेपालले अहिले गरिरहेको कूटनीतिक प्रगतिलाई अझ उज्यालो बनाउँदै अघि बढ्ने प्रतिबद्धतासमेत जाहेर गरे ।

उनले सार्वभौम समानताको आधारमा छिमेकी मित्रराष्ट्रसहित संयुक्त राष्ट्रसंघ सहित सबै देशहरूसँग समन्वय गरिरहेको बताए ।

'दक्षिण एसियाको भूराजनीतिमा पनि परिवर्तन आइरहेको छ,' उनले भने, 'आर्थिक असमानता, स्रोत र साधनको असमान वितरणले विभिन्न व्यवधान खडा गरेका छन् । आज समस्याहरूले एकता र सहकार्यको माग गरिरहेका छन् भने अर्कोतिर अतिवादी सोचहरू देखिएका छन् । कोरोनापछीको विश्व अहिल्यै सोच्न सकिदैन ।'

 कोरोनाका कारण सबैभन्दा ठूलो मार नेपाल जस्तो विकासशील देशलाई परेको परराष्ट्रमन्त्री ज्ञवालीले बताए ।