नेपाल क्लियरिङ हाउस लिमिटेड (एनसीएचएल) ले हालको महामारीको स्थितिमा नेपाल सरकार, बैंकिङ क्षेत्र र सर्वसाधारणलाई २ करोड ९१ लाख २० हजारभन्दा बढी सहयोग गरेको छ ।

एनसीएचएलले सम्पूर्ण भुक्तानी सेवाहरूमा लाग्ने कारोबार शुल्क मिनाहा गरेर, आफ्नो प्ल्याट फर्ममार्फत क्राउड फन्डिङ गरी र कोरोना नियन्त्रण तथा उपचार कोषमा प्रत्यक्ष अनुदान गरी सहयोग पुर्‍याएको छ ।

कोभिड–१९ को वर्तमान अवस्थामा डिजिटल भुक्तानीलाई प्रश्रय दिने उद्देश्यका साथ एनसीएचएलले एनसीएचएल–ईसीसी, एनसीएचएल–आईपीएस, कनेक्ट आईपीएस, एनपीई र कनेक्ट आरटीजीएस सेवाहरू प्रवाह गर्दै आएकोमा लकडाउन शुरू भएदेखि नै यी सम्पूर्ण भुक्तानीे सेवामा लाग्ने कारोबार शुल्कहरू मिनाहा गर्दै आइरहेको छ । यसरी कारोबार शुल्क मिनाहाबाट एनसीएचएलले २ करोड ३४ लाख ९ हजार २४३ रुपैयाँभन्दा बढीको प्रत्यक्ष योगदान गरेको छ ।
कनेक्ट आईपीएस प्रणालीमा ‘डोनेटफर कज’का रुपमा समावेश गरी सोबाट हालसम्म नेपाल सरकारको कोरोना भाइरस नियन्त्रण र उपचार कोषका लागि ४० लाख १९ हजार ४४८ रुपैयाँ संकलन गर्न सहयोग गरेको छ । यसका साथै एनसीएचएलले आफ्नो सामाजिक उत्तरदायित्व अन्तर्गत सरकारको कारोना उपचार कोषमा १७ लाख रुपैयाँ सहयोग गरेको छ, जसमध्ये १० लाख केन्द्रीय सरकारको कोरोना उपचार कोषमा र सातै प्रदेशको कोषमा १–१ लाख सहयोग प्रदान गरेको छ ।

‘सर्वसाधारण र व्यवसायहरू वर्तमान महमारीको स्थितिबाट निकै प्रभावित छन् । यस्तो अवस्थामा कारोबार शुल्क मात्र आम्दानीको मुख्य स्रोत भएता पनि एनसीएचएलले लकडाउन भएदेखि नै डिजिटल भुक्तानीका लागि अनुकूल वातावरण प्रदान गर्दै बैंकिङ क्षेत्र र सर्वसाधारणलाई थप सहयोग गर्न यसरी कारोबार शुल्क मिनाहा गर्र्ने निर्णय लिएको हो र एनसीएचएल महामारी विरुद्धको लडाइँमा सम्भव भएजति सबै तरिकाले थप सहयोग पुर्‍याउन प्रतिबद्ध रहेको छ,’ कम्पनीद्वारा प्रेषित विज्ञप्तिमा उल्लेख छ ।

एनसीएचएल नेपालमा राष्ट्रिय भुक्तानी प्रणाली लागू र सञ्चालन गर्न नेपाल राष्ट्र बैंक, बैंक तथा वित्तिय संस्था र स्मार्ट च्वाइर्स टेक्नोलोजी लिमिटेडद्वारा प्रवद्र्धित कम्पनी हो ।