प्रधानमन्त्री केपी शर्मा ओलीले संविधान संशोधन विधेयकमाथिको सैद्धान्तिक छलफलका क्रममा देखिएको राष्ट्रिय एकताप्रति प्रसन्नता व्यक्त गरेका छन् ।

अप्ठ्यारो बेलामा राष्ट्र एक हुने, राष्ट्रिय एकता कायम हुने नेपाली चरित्रलाई यसले प्रकट गरेको उनले बताए । 

‘सभामुख महोदय, हिजोको सभामा असाधारण राष्ट्रिय एकता देखिएको छ । आजको हाम्रो अगाडि रहेका विभिन्न चुनौती सामना गर्न, चाहे राष्ट्रियताको सबालमा होस् या कोभिड– १९ को सवाल अथवा यसले उत्पन्न गरेका विभिन्न जटिलता र अप्ठ्यारोको सामना गर्न आज जुन राष्ट्रिय एकता र साझा प्रयास आवश्यक छ, हिजोको सभामा त्यो देखापर्‍यो । त्यस एकताप्रति गर्व गर्दछु,’ बुधवार प्रतिनिधि सभा बैठकलाई सम्बोधन गर्दै प्रधानमन्त्री ओलीले भने, ‘दलीय व्यवस्थामा संसदीय अभ्यासमा त्यस्ता राष्ट्रिय एकता, सुदृढ एकताका परिस्थितिहरू कहिले–कहिले मात्र देख्न पाइनेजस्ता हुन्छन् । हाम्रो संसद् यस मामिलामा अत्यन्तै गम्भीर छ, परेको बेला राष्ट्रिय समस्यासँग जुध्न, राष्ट्रका अगाडि आएका साझा चुनौती सामना गर्न हाम्रो संसद् जिम्मेवार छ, एकताबद्ध भएर अगाडि बढ्न सक्छ, सक्षम छ, भन्ने देखाएको छ ।’

राष्ट्रिय एकता, भौगोलिक अखण्डता र राष्ट्रिय स्वाधीनता स्थापित गर्ने प्रयास साझा प्रयत्न भएको स्पष्ट भएको उनले बताए ।

‘जनताको प्रतिनिधिको रूपमा संसद्ले जुन जनभावनालाई मुखरित गरेको छ, यो धेरै सह्रानीय कुरा हो,’ उनले भने । 

कसैले जश लिन, श्रेय लिन या कसैको देवत्वकरण गर्न आवश्यक नभएको ओलीले बताए । हिजो प्रतिनिधि सभामा ८४ सांसदले सरकारको कदमको प्रशंसा गरेका थिए ।