नेपाल प्रहरीका प्रहरी नायब उपरीक्षक (डीएसपी) कुमोद ढुंगेललाई जिल्ला अदालत काठमाडौंले हिजो (मंगलवार) साधारण तारेखमा रिहा गर्ने आदेश दियो ।

डकैती मुद्दा लागेका डीएसपी ढुंगेलविरुद्ध प्रमाण नपुगेको भन्दै जिल्ला अदालत काठमाडौंले उनलाई साधारण तारेखमा छाड्ने आदेश दिएको हो ।  

अदालतको आदेशसँगै डीएसपी ढुंगेलले प्रहरी प्रधान कार्यालयमा निलम्बन फुकुवाको निवेदन दिएका छन् । उनको निलम्बन फुकुवा भएमा जिम्मेवारीमा फर्किने अवसर प्राप्त हुनेछ ।

उनी भूमिगत अवस्थामै जिल्ला अदालत काठमाडौंमा उपस्थित भएका थिए । 

२०७६ चैत २६ गते काठमाडौंको रानीबारीमा भएको डकैतीका अभियुक्त विकास श्रेष्ठसँग पटक–पटक सम्र्पक भएको भन्दै महानरीय अपराध अनुसन्धान महाशाखाले ढुंगेललाई डकैती समूहलाई सघाएको आरोप लगाएको थियो । 

तत्कालीन समयमा पनि प्रमाण नपुगेको भन्दै जिल्ला सरकारी वकिलको कार्यालयले मुद्दा नचाउने निर्णय गरेको थियो, तर उनलाई फसाउनका लागि पूर्व प्रहरी महानिरीक्षक (आईजीपी) सर्वेन्द्र खनाल र उनका निकटतम् प्रहरी अधिकृतले नियोजितरूपमा मुद्दा दायर गराएको आरोप एक प्रहरी अधिकृत लगाउँछन् ।

‘त्यो बेलामा सरकारी वकिलको कार्यालयले मुद्दा दर्ता नगर्ने भनेकै थियो तर उहाँमाथि रिसइवी साँध्न मुद्दा दर्ता भएको थियो,’ ती अधिकृतले भने ।

त्यसपछि ढुंगेल निलम्बनमा परेका थिए ।

ढुंगेललाई निलम्बन गरेपछि प्रहरीमा विरोधका स्वरहरू समेत सुनिएका थिए । 

काम गर्ने प्रहरी अधिकृतलाई निलम्बन गर्दा अन्य अधिकृतहरूको पनि मनोबल गिर्ने, आगामी दिनमा खुलेर काम गर्न अप्ठ्यारो हुने आवाज उठेका थिए ।

अपराध अनुसन्धानका जानकारका अनुसार, अपराधीलाई पक्राउ गर्न अपराधी जस्तै बन्नुपर्ने र उनीहरूसँग सम्बन्ध बढाएर उनीहरूलाई पक्राउ गर्ने संसारभर चल्दै आएको चलन हो । 

अर्थात् देश र नागरिकको हितका लागि अपराधिक संगठनमा प्रहरी अधिकारीहरू घुसाउने र त्यसबाट सूचना संकलन गर्ने पनि गरिन्छ, जसलाई ‘कभर्ट अपरेसन’ भन्ने गरिन्छ र यो आफैंमा जोखिमपूर्ण छ ।

चरीदेखि मनोज पुनसम्मको इन्कान्टर, रामेछापको चर्चित बलात्कार घटनाका अभियुक्त श्याम राउतलाई भारतबाट पक्राउ, लागूऔषध कारोबारी तथा गुण्डा नाइके सुजन पौडेल उर्फ रमेश बाहुनलाई पक्राउ गर्ने महत्त्वपूर्ण काम ढुंगेलले नै गरेका थिए ।

निर्माण व्यवसायी महासंघका अध्यक्ष शरद गौचनका हत्या योजनाकार समिरमान सिंह बस्न्यातलाई पक्राउ गर्न नेपाल प्रहरीले डीएसपी ढुंगेललाई नै परिचालित गरेको थियो ।

अध्यक्ष गौचनको विक्रम संवत् २०७४ असोजमा गोली हानेर हत्या गरिएको थियो ।​

त्यसबेलामा सीआईबी, अपराध महाशाखा र विशेष छानबिन समितिको टोली बस्न्यातलाई पक्राउ गर्न असफल भएपछि तत्कालीन आईजीपी प्रकाश अर्यालले तत्कालीन प्रमुख प्रहरी नायब महानिरीक्षक (डीआईजी) पुष्कर

कार्कीको सल्लाहमा ढुंगेललाई परिचालित गर्ने निर्णय गरेका थिए । ढुंगेलले बस्न्यातलाई भारतको गोवाबाट पक्राउ गरेका थिए ।

प्रहरीमा भएका काविल अपराध अनुसन्धान अधिकृतहरूलाई निलम्बन गर्नुले संगठनभित्र अनुसन्धान क्षमतामा पक्कै पनि असर पर्छ, जसले गर्दा आगमी दिनमा अपराध अनुसन्धानमा सत्यतथ्य नआउन पनि सक्छ । 

एउटा नेतृत्वले सहयोग गरेका प्रहरी अधिकृतलाई अर्को प्रहरी नेतृत्वले रिसइवी साँध्ने गरेका कारण नै कुमोद ढुंगेलजस्ता काबिल प्रहरी अधिकृतहरूको मनोबलमा असर परेको प्रहरी अधिकृतहरू बताउँछन् ।

कहीँ न कहीँ राजनीतिक रागले गर्दा पनि अनुसन्धानमा असर पारेको देखिन्छ, जसको ज्वलन्त उदाहरण हो, निर्मला हत्याकाण्ड ।

निर्मला हत्याकाण्डका दोषी अझै पत्ता लाग्न सकेको छैनन् ।

उक्त घटनाको अनुसन्धान गरिरहेका ६ जना प्रहरी अधिकारीहरू पनि निलम्बनमा परेका थिए ।