भारत र चीनले राजनीतिक तथा सभ्यतागत प्रज्ञा उपयोग गरेर सीमाविवाद समाधान गर्नुपर्ने तथा सैन्य भिडन्तको तयारी गर्न नहुने भारतका पूर्वप्रधानमन्त्रीका एक वरिष्ठ सल्लाहकारले ग्लोबल टाइम्सलाई बताएका छन् । 

मंगलवार ग्लोबल टाइम्सलाई अन्तर्वार्ता दिँदै सुधीन्द्र कुलकर्णीले दुवै मुलुक सैन्य भिडन्तका लागि तयार नरहेको र तयार हुन पनि नहुने बताए । कुलकर्णी भारतका पूर्वप्रधानमन्त्री अटलबिहारी वाजपेयीका सल्लाहकार हुन् । 
 

उग्रराष्ट्रवाद भारत र चीन दुवैका लागि हानिकारक छ, उनले भने । भारतले चिनियाँ सामान बहिष्कारको मूर्खतापूर्ण अभियान चलाएको उनी बताउँछन् । ‘विकासशील देश तथा दुई ठूला छिमेकीको नाताले हामी एकअर्कासँग

सहकार्य गर्नुपर्छ र मुलुकको समृद्धिमा योगदान गर्नुपर्छ साथै विश्वको शान्ति र विकासमा पनि योगदान गर्नुपर्छ,’ उनले भने ।

सीमामा दुर्भाग्यपूर्ण भिडन्त हुनुअघि अमेरिकाले चीनलाई घेराबन्दी गर्ने विशाल रणनीति अघि बढाइरहेको कुलकर्णीले बताए । अनि अमेरिकाले यो लक्ष्यप्राप्तिका लागि कथित क्वाड्रिल्याटरल मार्फत अन्य देशसँग सुरक्षा साझेदारी बढाउन खोजेको उनले बताए । 

‘दुर्भाग्यवश हाम्रै देशका केही मानिस अमेरिकासँग हातेमालो गरेर चीनलाई घेराबन्दी गर्नेमा विश्वास गर्छन् । यो गलत र खतरनाक सोच हो र यसले भारतको कदापि हित गर्दैन,’ उनले भने । 

अमेरिकाले भारतलाई कुनै पनि सैन्य भिडन्तमा साथ नदिने र उसले साथ दिने सोच्नु भ्रम हो, कुलकर्णीले दाबी गरे । ‘पहिलो त, सैन्य भिडन्त हुनै हुँदैन । मानौं सैन्य भिडन्त भएछ भने पनि अमेरिका त्यसमा संलग्न हुँदैन,’ उनले भने । 

अमेरिकासँग आफ्नै कैयौं समस्या रहेको अनि वर्षौंदेखि उसले विश्वका विभिन्न कुनामा औचित्य साबित नहुने युद्धहरू लडेकाले उसको रुचि यसमा नरहेको उनले बताए । 

अमेरिकाले अन्य देशको आन्तरिक मामिलामा हस्तक्षेप गर्ने नीतिको समीक्षा गर्नुपर्ने र सैन्य मानसिकता त्याग्नुपर्ने उनको भनाइ छ । त्यस्तो मनस्थितिले ऊ आफैंलाई चोट पुर्‍याउने र उसको पतन गराउने उनले बताए ।