प्योङयाङले दक्षिण कोरियाविरुद्ध सैन्य कारवाहीको योजना स्थगित गरेको र दुई देशको सीमामा हालै राखिएका लाउडस्पीकरहरू हटाएको जानकारी दिएको छ ।

उत्तरबाट भागेर आएकाहरूले पठाएको पर्चाका विषयमा दुई देशबीचको तनाव चरममा पुगेको बेलामा यो कदम चालिएको हो । 

बुधवार बसेको बैठकमा वर्कर्स पार्टी अफ कोरियाले हालै विकसित घटनाक्रमको मूल्यांकन गर्दै दक्षिण कोरियाविरुद्ध सैन्य कारवाही गर्ने प्रस्ताव स्थगित गरेको उत्तरको सरकारी समाचार संस्था केसीएनएले लेख्यो । 

हालैका हप्तामा उत्तर र दक्षिण कोरियाबीचको शत्रुता चर्किएको छ । सरकारविरोधी पर्चा पठाउनबाट भगौडाहरूलाई रोक्न दक्षिणले पर्याप्त प्रयास नगरेको भन्दै प्योङयाङले गुनासो गरेपछि तनाव चर्किएको थियो । 

यसै महिनाको आरम्भमा उत्तरले दक्षिणसँगको सञ्चार हटलाइन काटिदिएको थियो अनि सन् २०१८ मा बनाइएको अन्तर्कोरियाली सम्पर्क कार्यालय भवन बम हानेर उडाएको थियो । आफूले सीमामा सैन्य अभ्यास पनि सुचारु गर्ने उसले चेतावनी दिएको थियो ।